كوكپارشىلار مەن بۇركىتشىلەر «استانا جۇلدىزى» تۋرنيرىنە كەلىپ جاتىر
جارىسقا استانا، الماتى قالالارى مەن بارلىق 14 وبلىستىڭ كوماندالارى قاتىسادى، دەپ حابارلايدى astana.kz.
تۋرنيردى ۇيىمداستىرۋشىلار - استانا قالاسىنىڭ اكىمدىگى مەن قازاقستان رەسپۋبليكاسىنىڭ ۇلتتىق سپورت تۇرلەرى قاۋىمداستىعى.
قالىڭ جۇرتشىلىق ءۇش كۇن بويى قازاقتىڭ ۇلتتىق ويىندارىنىڭ سان ءتۇرىن تاماشالاي الادى. اتاپ ايتقاندا، ورتا قاشىقتىقتاعى جۇيرىكتەردىڭ بايگەسى وتەدى. ەلىمىزدىڭ تاڭداۋلى 16 كومانداسى ءۇش تاۋلىك كوكپار مەن اۋدارىسپاق دوداسىنىڭ كورىگىن قىزدىرماق.
تەڭگە ءىلۋدىڭ ەڭ ۇزدىك شەبەرلەرى مەن قىز قۋۋدىڭ تەڭدەسسىز جۇپتارىنىڭ ونەرى نازارعا ۇسىنىلادى. شۋ اساۋدى جۇگەنسىز مىنەتىن جۇرەكتى جىگىتتەر اساۋ ۇيرەتۋ سايىسىنا تۇسەدى.
قۇرالايدى كوزگە اتقان ساداقشىلار قۇيعىتا شاپقان ات ۇستىنەن جامبى اتىپ، مەرگەندىك سىناسادى. ءۇش كۇن بويى توعىزقۇمالاق پەن اسىق اتۋدىڭ باسەكەسى قىزادى. قىران باپتاپ تۇلكى، قاسقىر اۋلاعان، قارشىعا مەن سۇڭقار باپتاپ سان ءتۇرلى قۇس ىلدىرگەن قۇسبەگىلەر كورسەتىلىمى بولادى.
ور قوياندى قىر اسىرماي ۇستايتىن جۇيرىك تازىلار فەستيۆالى «استانا جۇلدىزى» تۋرنيرىندەگى جۇرت ايتا جۇرەر قىزىقتىڭ قاتارىن ارتتىرادى.
وسىنداي ۇلتتىق ويىنداردان باسقا دا قالىڭ قاۋىم سۇيسىنە تاماشالايتىن تارتىمدى قىزىقتار از بولمايدى. اتشابار الاڭىن جاعالاي اقشاڭقان كيىز ۇيلەر تىگىلىپ، قازاقتىڭ بايىرعى تۇرمىس-سالتى ناسيحاتتالادى. جەلىدە قۇلىن جۋساتقان جىلقىلى اۋىلدىڭ «قىمىز مۇرىندىعى»، كوگەنگە قوي-ەشكىسىن بايلاعان قويلى اۋىلدىڭ، سيىرلى، تۇيەلى اۋىلداردىڭ شىنايى قاربالاس تىرشىلىگى قالا جۇرتشىلىعىنا تاڭداي قاقتىرار كورىنىستەر بولماق. شاڭىراقتى شەڭبەرلەپ، مورعا سالىپ ۋىق يگەن، تەمىر مەن اعاشتان ءتۇيىن تۇيگەن قازاقى ۇستالار شەبەرلىگى نازارعا ۇسىنىلادى.
ءۇش كۇندىك تۋرنير بارىسىندا ايگىلى ونەر يەلەرىنىڭ قاتىسۋىمەن وتەتىن كونسەرتتىك باعدارلامالار، قول ونەر كورمەلەرى جانە تويشى قاۋىمعا ارناپ ۇلتتىق تاعام تۇرلەرىنەن فەستيۆالدەر ۇيىمداستىرىلادى.