قانات يسلامنىڭ قارسىلاسى كىم؟
قانات يسلام ورتا جەڭىل سالماق بويىنشا كاريب ايماعىنىڭ ۇزدىگى، WBA FedeCaribe تۇجىرىمىنىڭ چەمپيونى. ول وسى ۋاقىتقا دەيىن 21 كەزدەسۋ وتكىزىپ، بارىندە جەڭىسكە جەتكەن. ونىڭ 18 ءىن نوكاۋتپەن ۇتقان. لاقاپ اتى «قازاق».
بۇگىن قانات يسلامنىڭ وزىمەن حابارلاسىپ، قارسىلاسىنىڭ كىم ەكەنىن سۇراپ بىلدىك.
«قارسىلاسىم تۋرالى سىرتتاي جاقسى بىلەم. ول گانالىق بوكسشى. ەسىمى - پاتريك اللوتەي. ول كاسىپقوي بوكستا وسى ۋاقىتقا دەيىن 36 كەزدەسۋ وتكىزىپتى. ونىڭ ەكەۋىندە عانا ۇتىلىپ، قالعان جەكپە-جەكتەرىنىڭ بارلىعىندا جەڭىسكە جەتكەن. ال 24 كەزدەسۋىندە قارسىلاسىن نوكاۋتپەن ۇتقان بوكسشى»، - دەپ اتاپ ءوتتى قانات يسلام.
ول سونداي-اق، الماتىدا جەكپە-جەككە اسا جوعارى دەڭگەيدە جاتتىعۋ جاساپ جاتقانىن، ءوز ەلىندە جەرگىلىكتى جانكۇيەرلەردى ۇيالىتپايتىنداي ونەر كورسەتەتىنىن ايتىپ ءوتتى.
«قارسىلاسىم وسال ەمەس. ول دا «جەڭسەم» دەگەن نيەتپەن كەلە جاتىر. ءبىراق، مەن كاسىبي رينگكتە العاش رەت ءوز ەلىمىزدە جەرگىلىكتى جانكۇيەرلەر الدىندا شارشى الاڭعا شىققالى وتىرمىن. مەن ولاردى ۇياتقا قالدىرمايمىن دەپ ويلايمىن. الماتىدا كۇندىز-ءتۇنى جاتتىعىپ جاتىرمىن. قازىر جۇمىس جوسپارىم ءبارى ويداعىداي ءجۇرىپ جاتىر»، - دەدى بوكسشى.
سونىمەن بىرگە، قانات يسلام 29- قازاندا جانكۇيەرلەرىن جەكپە-جەك وتەتىن «Almaty arena» سپورت كەشەنىنە شاقىردى.
«بۇل جەكپە-جەك مەن ءۇشىن عانا ەمەس، قازاق ەلى ءۇشىن اسا ماڭىزدى دەپ ويلايمىن. سەبەبى، (WBA (Interim تۇجىرىمى بويىنشا الەم چەمپيونى اتاعىنا تالاسقالى وتىرمىن. سوندىقتان، 29- قازان كۇنى بارلىق جانكۇيەرلەرىمدى جارىس وتەتىن الماتى قالاسىندا «Almaty arena» سپورت كەشەنىنە كەلىپ، مەنىڭ ونەرىمدى تاماشالاۋعا شاقىرامىن»، - دەدى بوكسشى قانات يسلام.
اۆتور: كۇنسۇلتان وتارباي