ەسكە سالا كەتسەك، ەل بيلىگى وزبەكستان باسشىسىنىڭ قايتىس بولعانىن رەسمي كەشە حابارلاعان ەدى. يسلام كاريموۆتى بۇگىن سامارقاند قالاسىنا جەرلەيدى.
بۇگىن تاڭەرتەڭ تاشكەنتتىڭ ورتالىق كوشەلەرىنىڭ ەكى جاعىنا قولدارىنا گۇل ۇستاعان قالا تۇرعىندارى ءتىزىلدى. قوزعالىس بولىگىنە جاقىن تۇسقا ەكى قاتار پوليتسيا قىزمەتكەرلەرى قويىلعان. كورشى كوشەلەردە كولىك قوزعالىسى توقتاتىلعان. سونداي- اق، قالادا پويىزداردىڭ ءجۇرۋ كەستەسى دە وزگەرتىلگەن.
فەيسبۋكتە مۋراد نازاروۆ اتتى پايدالانۋشى وسى جەردەن ۇيالى تەلەفونىنا تۇسىرىلگەن ۆيدەو جاريالادى. وندا مەملەكەت باسشىسىنىڭ دەنەسىن سامارقاند قالاسىنا الىپ ۇشاتىن ۇشاققا الىپ بارا جاتقان كولىكتەر كورتەجىن كۇتىپ العان مىڭداعان وزبەكستاندىقتاردى كورۋگە بولادى.