ەربولات دوسايەۆ بەيجىڭدە ءبىرقاتار ىسكەرلىك كەلىسسوز وتكىزدى
ە. دوسايەۆ قىتايدىڭ ءىرى مەملەكەتتىك CITIC Group كورپوراتسياسىنىڭ پرەزيدەنتى ۆان سزيۋنمەن كەزدەستى. تاراپتار «نۇرلى جول» مەملەكەتتىك باعدارلاماسى جانە يندۋستريالىق-يننوۆاتسيالىق دامۋ جونىندەگى وزەكتەندەندىرىلگەن باعدارلاماسى اياسىندا بىرلەسكەن يندۋستريالىق جانە ينفراقۇرىلىمدىق جوبالاردى ىسكە اسىرۋ بويىنشا ىنتىماقتاستىقتى جالعاستىرۋعا نيەتتى ەكەندەرىن راستادى.
سونىمەن قاتار ونىڭ قىتاي مەملەكەتتىك بانكىنىڭ ۆيتسە-پرەزيدەنتى دين سيانگچۋنمەن كەزدەسۋىندە سەرىكتەس قازاقستاننىڭ دامۋ بانكى («بايتەرەك» حولدينگىنىڭ ەنشىلەس ۇيىمى) ارقىلى «نۇرلى جول» باعدارلاماسى اۋقىمىنداعى جوبالاردى قارجىلاندىرۋ كولەمىن ۇلعايتۋ تۋرالى ءسوز قوزعالدى. سونداي-اق، تاراپتار ادام كاپيتالىن دامىتۋ ماڭىزدىلىعىن اتاپ ءوتىپ، بىرلەسكەن ترەنينگتەر مەن سەمينارلاردى ۇيىمداستىرۋ ارقىلى تاجىريبە الماسۋدى جانداندىرۋدى ۇسىندى.
حولدينگ ءتوراعاسىنىڭ ازيا ينفراقۇرىلىمدىق ينۆەستيتسيالار بانكىنىڭ (ا ي ي ب) ۆيتسە-پرەزيدەنتى دي دجەي پانديانمەن جۇرگىزگەن كەلىسسوزدەر قورىتىندىسى بويىنشا تاراپتار ەنەرگەتيكا، كولىك ينفراقۇرىلىمى مەن ازىق-تۇلىكتى وڭدەۋ سالالارىنداعى باسىم ينفراقۇرىلىمدىق جوبالاردى بىرلەسىپ قارجىلاندىرۋ ءۇشىن اقپاراتپەن الماسۋ جانە جاڭا ينۆەستيتسيالىق مۇمكىندىكتەردى ىزدەستىرۋ جونىندەگى جۇمىستاردى جانداندىرۋ قاجەتتىلىگىن تىلگە تيەك ەتتى.
«بايتەرەك» حولدينگىنىڭ جاڭا قۇرالدارىن، ونىڭ ىشىندە كورپوراتيۆتىك كەپىلدىك بەرۋدى پايدالانا وتىرىپ، ينۆەستيتسيالىق جوبالاردى قارجىلاندىرۋ مۇمكىندىگىن قاراستىرۋ ۋاعدالاستىعىنا ە. دوسايەۆتىڭ قىتايدىڭ «ەكسيمبانك» ۆيتسە-پرەزيدەنتى يۋان سينيونگپەن كەزدەسۋىندە قول جەتكىزىلدى. وسىدان بۇرىن «بايتەرەك» حولدينگىنىڭ ەنشىلەس ۇيىمدارى قىتايلىق بانكپەن بىرلەسىپ، مۇنايدى وڭدەۋ جانە مەتاللۋرگيا سالاسىنداعى ءىرى يندۋستريالىق جوبالاردى تابىستى جۇزەگە اسىرعان بولاتىن.
اۆتور: مارلان جيەمباي