استانا فورۋمى عالامنىڭ اسا وتكىر ماسەلەسىنە ارنالادى
فورۋم ب ۇ ۇ باس اسسامبلەياسىنىڭ قارارىنا سايكەس جىل سايىن اتالىپ وتىلەتىن يادرولىق سىناقتارعا قارسى ءىس-قيمىلدىڭ حالىقارالىق كۇنى اياسىندا وتەدى. قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ كونفەرەنتسيادا سويلەيتىن ءسوزى جيىنعا قاتىسۋشىلار نازارىن تارتاتىن باستى وقيعا بولماق. فورۋم بارىسىندا جالپى وتىرىس، سونداي-اق «ب ۇ ۇ جانە قارۋسىزداندىرۋ ۇدەرىستەرى: كەلەشەگى قانداي؟ «الەم. ХХІ عاسىر» مانيفەسى»، «يادرولىق سىناقتارعا تىيىم سالۋ جانە يادرولىق قارۋسىزدانۋعا قول جەتكىزۋدەگى بۇۇ ءرولى»، «يادرولىق قارۋعا ۇلتتىق دەڭگەيدە تىيىم سالۋ جانە يادرولىق قارۋدان ازات ايماقتار. ورنىقتى الەمنىڭ گەوگرافياسى»، «باستامالار مەن ناۋقاندار - زاڭ شىعارۋشىلار، ءدىني كوشباسشىلار جانە ازاماتتىق قوعام» تاقىرىپتارى بويىنشا ءتورت پانەلدىك سەسسيالارى وتەدى.
كونفەرەنتسيانىڭ قوسالقى ۇيىمداستىرۋشىسى يادرولىق قارۋدى تاراتپاۋ جانە جويۋ جولىنداعى پارلامەنتشىلەردىڭ(PNND) حالىقارالىق ۇيىمى بولىپ تابىلادى. فورۋمعا قاتىسۋشىلار يادرولىق قارۋدى قولدانۋ جانە سىناۋ قۇرباندارىن ەسكە الىپ، قارۋسىزداندىرۋ جانە تاراتپاۋدىڭ وزەكتى ماسەلەلەرىن قارايدى جانە حالىقارالىق قاۋىپسىزدىكتى نىعايتۋ جونىندەگى ۇسىنىستار ايتادى دەپ كۇتىلۋدە.
كونفەرەنتسيانى ۇيىمداستىرۋ كوميتەتىنىڭ باسشىسى، سەنات ءتوراعاسى قاسىم-جومارت توقايەۆتىڭ پىكىرىنشە، سەمەي پوليگونىنىڭ جابىلۋىنا 25 جىل تولۋى جاھاندىق ماڭىزى بار داتا بولىپ تابىلادى. «قازاقستان پرەزيدەنتى نۇرسۇلتان نازاربايەۆ جاھاندىق يادرولىق قارۋعا قارسى قوزعالىستىڭ كوشباسشىسى بولىپ ءىس جۇزىندە مويىندالعان تۇلعا. ونىڭ سەمەي يادرولىق پوليگونىن تولىقتاي جابۋ تۋرالى شەشىمى الەمدىك قارۋسىزدانۋ تاريحىندا العاشقى جانە سوڭعى مىسال بولىپ تابىلادى. مەملەكەت باسشىسىنىڭ «الەم. ХХІ عاسىر» مانيفەسىنىڭ نەگىزىندە قارۋسىزدانۋ يدەياسى جاتىر.
سەمەي پوليگونىنىڭ جابىلۋىنا 25 جىل تولۋى - جەر بەتىندە ورنىقتى الەم قۇرۋدىڭ ءبىرىنشى كەزەكتە ماڭىزدىلىعى جانە قاۋىپسىزدىك پروبلەمالارىنا جاڭا بىرلەسكەن شەشىمدەر ۇسىنۋ تۋرالى بۇكىل الەم قاۋىمداستىعىنا ويلانۋدىڭ ەڭ وڭتايلى مۇمكىندىگى»، - دەپ اتاپ ءوتتى ق. توقايەۆ.
استانا كونفەرەنتسياسىنا ب ۇ ۇ باس حاتشىسىنىڭ ورىنباسارى، ب ۇ ۇ جەنيەۆا ءبولىمىنىڭ باس ديرەكتورى، قارۋسىزداندىرۋ جونىندەگى كونفەرەنتسيانىڭ باس حاتشىسى مايكل مەللەر، يادرولىق سىناققا جالپىعا بىردەي تىيىم سالۋ تۋرالى شارت ۇيىمى دايارلاۋ كوميسسياسىنىڭ اتقارۋشى حاتشىسى لاسسينا زەربو، پارلامەنتارالىق وداقتىڭ پرەزيدەنتى جانە PNND تەڭ ءتوراعاسى سابەر چوۋدحۋري، پانافريكالىق پارلامەنتتىڭ پرەزيدەنتى رودجەر نكودو دانگ، بولگاريانىڭ ۆيتسە-پرەزيدەنتى مارگاريتا پوپوۆا، مارشالل ارالدارى نيتيدجەلىنىڭ (پارلامەنت) ءتوراعاسى كەنەف كەدي، موڭعوليانىڭ تۇڭعىش پرەزيدەنتى پۋنسالمااگين وچيربات، كورەيا رەسپۋبليكاسىنىڭ قوسىلۋ ءمينيسترى حون ەن پە، پاگۋوش عىلىم جانە حالىقارالىق ىستەر قوزعالىسىنىڭ پرەزيدەنتى دجايانتحا دحاناپالا، الەمدىك دىندەر پارلامەنتىنىڭ ءتوراعاسى يمام ابدۋل ماليك مۋدجاحيد، «نيەۆادا-سەمەي» انتيادرولىق قوزعالىسىنىڭ نەگىزىن سالۋشى ولجاس سۇلەيمەنوۆ، باسقا دا حالىقارالىق ۇيىمداردىڭ، ۇكىمەتتىك ەمەس ۇيىمداردىڭ كورنەكتى وكىلدەرى، جالپى العاندا ەلۋدەن استام ەلدەردىڭ بەلگىلى ءدىني قايراتكەرلەرى قاتىسادى. استانا كونفەرەنتسياسىندا قورىتىندى قۇجات قابىلداناتىن بولادى.
اۆتور: سەرىك قاراجان