ۆاديم پريسياجنيۋك: داريعانىڭ قولا مەدالى التىنمەن تەڭ

الماتى. قازاقپارات - داريعانىڭ قولا مەدالى التىنمەن تەڭ. وليمپيادا جۇلدەگەرىن قارسى الۋ كەزىندە بوكستان قازاقستاننىڭ ايەلدەر قۇراماسىنىڭ باس باپكەرى ۆاديم پريسياجنيۋك وسىلاي دەدى.

«بۇل جىل ءبىز ءۇشىن وتە تابىستى جىل بولدى. وزدەرىڭىزگە بەلگىلى استانا قالاسىندا ايەلدەر اراسىندا الەم بىرىنشىلىگى ءوتتى. ءتورت قىزىمىز التىننان القا تاقتى. ءسويتىپ، جالپى كوماندالىق ەسەپتە ءبىرىنشى ورىن الدىق. بىزدە ايەلدەر بوكسىنىڭ دامىپ جاتقاندىعىن، بىزبەن ساناسۋ كەرەكتىگىن دالەلدەدىك.

ال، ريو وليمپياداسىندا مەدالگە قول جەتكىزەتىنىمىزدى ايتقانمىن. ءبىراق، قانداي مەدال ەكەندىگىن ايتقان جوق بولاتىنمىن. ال، داريعانىڭ بۇل قولا مەدالى ءبىز ءۇشىن التىنمەن تەڭ. ويتكەنى، داريعا وليمپيادا چەمپيونىنان جەڭىلدى»، - دەدى بوكستان قازاقستاننىڭ ايەلدەر قۇراماسىنىڭ باس باپكەرى ۆاديم پريسياجنيۋك.

ول سونىمەن قاتار، داريعانىڭ قولىنان كەلگەنىنىڭ بارلىعىن جاساعانىن، وعان ەشقانداي كىنارات تاعا المايتىندىعىن ايتتى.

«ەندى بىزگە تاعى دا جۇمىس ىستەۋ كەرەك. بولاشاقتا ونى دا جەڭە الامىز (رەد. امەريكالىق بوكسشى كلاريسسا ءشيلدستى)، ەگەر ول كاسىپقوي بوكسقا كەتىپ قالماسا ارينە. ءبىراق، ول وسى وليمپيادادان كەيىن كاسىپقوي بوكسقا كەتۋى ابدەن مۇمكىن»، - دەدى باپكەر.

ايتا كەتەلىك، داريعا شاكىموۆا برازيليانىڭ ريو-دە-جانەيرو قالاسىندا وتكەن XXXI جازعى وليمپياداسىندا 75 كەلىگە دەيىنگى سالماق دارەجەسىندە ونەر كورسەتتى. بارلىعى شارشى الاڭعا ءۇش رەت شىقتى - 1/8 فينالدا كانادالىق اريان فورتيندى 2:1 ەسەبىمەن، 1/4 فينالدا ماروككالىق حادجيدجا ءمارديدى 3:0 ەسەبىمەن جەڭسە، جارتىلاي فينالدا اعىمداعى الەم چەمپيونى، 2012-جىلعى لوندون وليمپياداسىنىڭ چەمپيونى كلاريسسا شيلدسكە (ا ق ش) ەسە جىبەرىپ، الدى. ءسويتىپ، قولا مەدالگە يە بولدى.

اۆتور: ايبوتا جاپپاربەرگەن