قازاق تىلىندەگى ەڭ ادەمى سوزدەر انىقتالدى

استانا. قازاقپارات - ساۋالناما جۇرگىزۋ ناتيجەسىندە قازاق تىلىندەگى ەڭ ادەمى ءسوز «اينالايىن» ەكەنىن انىقتادى.

«اينالايىن» ۇلكەننىڭ كىشىگە دەگەن ريزاشىلىعىن، ماحابباتىن بىلدىرەتىن، باسقا ەشبىر وزگە تىلدە بالاماسى جوق كوركەم ءسوز.

ال قازاق تىلىندەگى ەڭ ادەمى سوزدەردىڭ ۇشتىگىنە ەڭ قادىرلى دە قاسيەتتى ۇعىمدار - «انا» مەن «اكە» ەندى.

سونداي-اق، ساۋالناماعا قاتىسقاندار «جانىم» ءسوزىنىڭ قازاق تىلىندەگى الاتىن ورنى ەرەكشە دەگەن. اتالمىش ءسوز ەڭ قىمباتتى دەگەن جاندارعا ايتىلادى. «جانىم» ءسوزى 4- ورىندى ەنشىلەدى.

بەسىنشى ورىندا نازىك جاندىلارعا قاراتىلىپ ايتىلاتىن -  «اياۋلى» ءسوزى. ايتا كەتەيىك، بىرنەشە جىلدان بەرى اياۋلىم قازاقستانداعى ەڭ تانىمال ەسىمدەردىڭ ءبىرى بولىپ كەلەدى.

قۇلاققا جاعىمدى ەستىلەتىن كەلەسى ءسوز - قۇلىنىم. قۇلىن - جىلقى ءتولى، ال قازاق حالقى قاشان دا جىلقى مالىن قادىر تۇتقان. وسىنى ەسكەرسەك، «قۇلىنىم» سوزىنە قاتىسۋشىلاردىڭ نەلىكتەن تاڭداۋ جاساعانىن ءتۇسىنۋ قيىن ەمەس.

ەڭ ادەمى 10 ءسوز قاتارىن «راحمەت»، «اتامەكەن»، «سەزىم» جانە «ارمان» سوزدەرى تولىقتىردى.

ال قازاق تىلىندەگى ەڭ جاعىمسىز ەستىلەتىن ءسوز «قۇقىق» ەكەن. الايدا قاتىسۋشىلاردىڭ كوپشىلىگى انا تىلدە جاعىمسىز ءسوزدىڭ بولۋى مۇمكىن ەمەستىگىن ايتقان.