وليمپيادا جۇلدەگەرى ەلميرا سىزدىقوۆا سارى كابريولەتپەن قاراعاندىنى ارالادى - فوتو، كەسكىن

قاراعاندى. قازاقپارات - ريو- دە- جانەيروداعى وليمپيادا ويىندارىنىڭ قولا جۇلدەگەرى ەلميرا سىزدىقوۆانى قاراعاندىدا سالتاناتپەن قارسى الدى، دەپ حابارلايدى «قازاقپارات» ح ا ا ءتىلشىسى.

سپورتشىنىڭ قۇرمەتىنە اۆتوشەرۋ ۇيىمداستىرىلدى. مەملەكەتتىك تۋى بار كولىكتەر «شاحتەر» ستاديونىنان باستاپ، قالانىڭ ورتالىق كوشەلەرىمەن ءجۇرىپ ءوتتى. سپورتشىنى سارى كابريولەتپەن الىپ ءجۇردى.

«مەنى جولدان توقتاتىپ، ءبىزدىڭ ماقتانىشىمىزدى قىدىرتۋدى ءوتىندى. قۋانا- قۋانا كەلىستىم. بۇل مەن ءۇشىن زور قۋانىش. مەن ءوزىم بۇرىنعى سپورتشىمىن، 7 جىل دزيۋدومەن اينالىسقانمىن»، - دەدى كولىك جۇرگىزۋشىسى ولگا بوگدانوۆا.

وليمپيادا جۇلدەگەرى وزىنە مۇنشا كوپ نازاردىڭ اۋدارىلعانىن ۇناتپايتىنىن مويىندادى.

«مەن تىنىشتىقتى، سابىرلىقتى جاقسى كورەمىن. اتا-انامنىڭ ۇيىندە دەمالۋدى جوسپارلاپ وتىرمىن (س ق و، ايىرتاۋ اۋدانى، كامەننىي برود اۋىلى - رەد. ). ولار مەنى استاناداعى اۋەجايدان كۇتىپ الدى، قازىر مەنىمەن بىرگە قاراعاندىدا»، - دەدى ە. سىزدىقوۆا.

ەلميرا سىزدىقوۆا - ءا. مولداعۇلوۆا اتىنداعى بالالار سپورتىندا دارىندىلارعا ارنالعان ينتەرناتتىڭ تاربيەلەنۋشىسى. ق ر ايەلدەر كۇرەسى بويىنشا حالىقارالىق سىنىپتاعى سپورت شەبەرى. 2011 -جىلعى جاستار اراسىنداعى الەم چەمپيوناتىنىڭ قولا جۇلدەگەرى. 2012 -جىلعى جاستار اراسىنداعى ازيا چەمپيونى، 2014 -جىلعى ازيا چەمپيوناتىنىڭ قولا جۇلدەگەرى، 2015 جانە 2016 -جىلدارداعى ازيا چەمپيوناتىنىڭ كۇمىس جۇلدەگەرى.

جەكە باپكەر - ۆلاديسلاۆ سۋتورمين.

قاراعاندىعا ەلميرا 10 جىل بۇرىن س ق و- دان كەلگەن. بۇعان وليمپيادالىق رەزەرۆ، بالالار- جاسوسپىرىمدەر مەكتەبىنىڭ باسشىسى، ونىڭ اعاسى رايىمبەك سىزدىقوۆ ىقپال ەتتى.

ەسكە سالساق، قازاقستاندىق ەلميرا سىزدىقوۆا جارىستا مىسىرلىق ەناس مۇستافانى 7:4 ەسەبىمەن ۇتىپ، وليمپيادانىڭ ءۇشىنشى ورنىن يەلەندى. 69 كەلىگە دەيىنگى سالماق ساناتىندا ءبىرىنشى ورىندى جاپوندىق سارا دوسو، ەكىنشى ورىندى رەسەيلىك ناتاليا ۆوروبيەۆا يەلەنگەن بولاتىن.