نۇرسۇلتان نازاربايەۆ: «قورعاستان» شياڭگاڭ پايدا بولادى
«ءبىزدىڭ ەلىمىز ارقىلى ەۋروپادان قىتايعا، وڭتۇستىك- شىعىس ازياعا الدەقايدا قىسقارعان جولدار وتەدى. ەسەپتەۋلەر بويىنشا تىنىق مۇحيتىنان شىققان تاۋار قىتاي جاعالاۋلارىنان ەۋروپاعا تەڭىز ارقىلى 45 تاۋلىكتە جەتەدى. ال ءبىزدىڭ ەلىمىزدەگى تەمىرجولدار ارقىلى ەۋروپاعا - 14 كۇندە جەتكىزۋگە بولادى. مىنە، پايداسى ايقىن كورىنىپ تۇر. سوندىقتان دا، ءبىز زاماناۋي مۋلتيمودالدى كولىكتىك- لوگيستيكالىق حاب قالىپتاستىرۋدى جۇزەگە اسىراتىن بولامىز»، - دەپ اتاپ ءوتتى نۇرسۇلتان نازاربايەۆ بۇگىن ۆارشاۆاداعى بيزنەس- فورۋمدا.
ەلباسىنىڭ سوزىنە قاراعاندا، قازىردىڭ وزىندە قىتايدىڭ ۇسىنىسى جانە جوباسى بويىنشا «ءبىر بەلدەۋ ءبىر جول» اتتى جىبەك جولىن قايتا جاڭعىرتۋ جۇمىستارى جۇزەگە اسۋدا. «ۇلى جىبەك جولى بارلىق كەزدە دە بارلىق باعىتتارعا قازاقستان ارقىلى ءوتىپ وتىراتىن. ءبىز قىسقا مەرزىم ارالىعىندا شامامەن 2,5 مىڭ شاقىرىم تەمىرجولدى جانە 4 مىڭ شاقىرىم اۆتوكولىك جولدارىن قايتا جاڭعىرتتىق. قازاقستان مەن قىتاي شەكاراسىنداعى «قورعاس» قۇرعاق پورتىن تىكەلەي بايلانىستىردىق سونىڭ ىشىندە 500 گەكتار قىتاي 500 گەكتار قازاقستان تاراپىنان قامتىلىپ وتىر. بۇل جابىق اۋماق. وندا قازىردىڭ وزىندە قالا سالىندى دەسە دە بولادى. مەن ول جەردە الداعى ۋاقىتتا گونكونگ(شياڭگاڭ) پايدا بولادى دەپ تە ويلايمىن»، - دەپ اتاپ ءوتتى پرەزيدەنت.
مەملەكەت باسشىسى سونىمەن قاتار، كاسپيي تەڭىزىندە ەكى تەڭىز پورتى سالىنعانىن، ولار باكۋ، كاۆكاز، قارا تەڭىز ارقىلى ەۋروپاعا شىعاتىنىن ايتتى.
«بىلتىرعى جىلى تۇركىمەنستان، يران ارقىلى پارسى شىعاناعىنا قاراي بەندەر- ابباس تەمىرجولىن اياقتادىق. مىنە، وسىنداي جولدار پولشالىق كومپانيالاردى قالاي قىزىقتىرمايدى؟! سوندىقتان دا، ءبىز وسى ماسەلەدە سىزدەرمەن ىنتىماقتاستىققا دايىنبىز»، - دەپ قورىتىندىلادى ءوز ءسوزىن مەملەكەت باسشىسى.
ەسكە سالا كەتەيىك، 22-23 -تامىزدا ق ر پرەزيدەنتى نۇرسۇلتان نازاربايەۆ پرەزيدەنت اندجەي دۋدانىڭ شاقىرتۋىمەن پولشاعا مەملەكەتتىك ساپارمەن كەلگەن بولاتىن. فورۋمعا ەكى ەلدەن 400 دەن استام كاسىپكەرلەر قاتىستى.
اۆتور: قانات مامەتقازى ۇلى