نۇرسۇلتان نازاربايەۆ: قازاقستان «ينۆەستورلار ءۇشىن جۇماق» ورناتادى

استانا. قازاقپارات - مەملەكەت باسشىسى بۇگىن قازاقستان- پولشا بيزنەس- فورۋمىندا پولشالىق ينۆەستورلاردى قازاقستاندا جۇمىس ىستەۋگە شاقىردى.

«ءبىز قازاقستاندا جىل سايىن ينۆەستيتسيالىق كليماتتى جاقسارتىپ كەلەمىز. ءبىر جاعىنان «ينۆەستورلار ءۇشىن جۇماق» ورناتىپ جاتىرمىز دەسە دە بولادى. 11 ميلليون ەۋرو جانە ودان جوعارى ينۆەستيتسيالار سالىپ، ەكونوميكانىڭ باسىمدىق بەرىلگەن سالالارىندا جۇمىس ىستەيتىن ينۆەستورلارعا جەڭىلدىكتەر قاراستىرىلعان. ماسەلەن، ولار كورپوراتيۆتىك جانە تابىس سالىعىنان، ون جىلعا دەيىنگى كەزەڭدە جەر سالىعىنان، مۇلىك سالىعىنان سەگىز جىلعا دەيىن بوساتىلادى»، - دەدى ۆارشاۆادا ءوتىپ جاتقان بيزنەس- فورۋم بارىسىندا. سونىمەن قاتار، جەرگىلىكتى بيزنەسمەندەر ينۆەستورلار ءۇشىن جوبالاردى جۇزەگە اسىرۋ كەزەڭىندە جانە ونى ىسكە قوسقاننان كەيىنگى ءبىر جىل بارىسىندا قانداي دا ءبىر كۆوتالارسىز، رۇقساتتارسىز شەتەلدىك جۇمىس كۇشىن تارتۋعا دا رۇقسات بەرىلگەنى تۋرالى اقپاراتتارمەن قانىقتى.

«ينۆەستورلارعا «جالعىز تەرەزە» قاعيداتى بويىنشا جاعدايلار دا جاسالعان. ياعني، ينۆەستور كەلگەننەن سوڭ، بارلىق ماسەلەلەرىن ءبىر عانا جەردەن شەشە الادى. رەزيدەنت ەمەستەر ءۇشىن 2017 -جىلى ءبىز قازاقستانمەن ۆيزاسىز جۇمىس ىستەيتىن مەملەكەتتەر سانىن 54-كە جەتكىزۋدى كوزدەپ وتىرمىز. بۇعان ە و ەلدەرى قوسىلادى، پولشا ازاماتتارى دا 2017 -جىلدىڭ قاڭتارىنان ءبىزدىڭ ەلىمىزگە ۆيزا راسىمدەمەستەن كەلە الادى»، - دەدى ن. نازاربايەۆ. ەلباسى ءوز سوزىندە ەلىمىزدە 10 ارنايى ەكونوميكالىق ايماق قىزمەت ەتەتىنىن اتاپ ءوتتى. ولاردا دا ينۆەستورلار ءۇشىن جەر، مۇلىك سالىعىنان بوساتۋ، ا ە ا اۋماعىندا تۇتىنىلاتىن تاۋارلاردى ققس- تان بوساتۋ سەكىلدى جەڭىلدىكتەر بەرىلگەن. ال وسى ايماقتارداعى جەر تەلىمدەرى ون جىلعا دەيىن تەگىن پايدالانۋعا ۇسىنىلادى.

«شاعىن جانە ورتا بيزنەس ءۇشىن قولداۋ مەن كاسىپكەرلىكتى دامىتۋدىڭ ءبىرىڭعاي باعدارلاماسى جۇزەگە اسۋدا. بۇل «بيزنەستىڭ جول كارتاسى 2020 دەپ اتالادى». وندا مەمەلكەتتىك قولداۋدىڭ ءتۇرلى شارالارى كرەديتتەر بويىنشا پايىزدىق ستاۆكالاردى سۋبسيديالاۋدان باستاپ سەرۆيستىك قىزمەت كورسەتۋگە دەيىنگى شارالارى قامتىلعان»، - دەدى ن. نازاربايەۆ.

بۇدان باسقا، نۇرسۇلتان نازاربايەۆ بيزنەس ءۇشىن اكىمشىلىك كەدەرگىلەردى تومەندەتۋگە باعىتتالعان جۇمىستار ۇدايى جۇرگىزىلەتىنىن، سوڭعى جىلدارى رۇقسات بەرۋ قۇجاتتارى ەكى ەسەگە تومەندەگەنىن ءمالىم ەتتى.

«ال جەكەشەلەندىرۋدىڭ العاشقى كەزەڭىندە ەلىمىزگە كەلگەن ءبىرىنشى ءىرى ينۆەستورلاردى قاتىستىرا وتىرىپ، مەن قر پرەزيدەنتى جانىنداعى شەتەلدىك ينۆەستورلار كەڭەسىن قۇرعان بولاتىنمىن. ءبىز جىلىنا ەكى مارتە كەزدەسىپ، تۋىنداعان بارلىق ماسەلەلەردى بەتپە بەت وتىرىپ شەشىپ كەلەمىز. قازىر بۇل كەڭەس ءوز جۇمىسىن ءتيىمدى دەڭگەيدە اتقارا باستادى، ماعان جانە مەن ارقىلى ولار ۇكىمەتكە ەكونوميكانىڭ ءتۇرلى سالالارىنداعى مىندەتتەردى شەشۋگە قاتىستى ۇسىنىستار تۋرالى كەڭەس بەرە الادى»، - دەپ اتاپ ءوتتى پرەزيدەنت.

اۆتور: قانات مامەتقازى ۇلى