بەت الپەتى ارقىلى ادام مىنەزىن انىقتاۋ

استانا. قازاقپارات - تانىمال ءانشى قاراقات ءابىلدينا ءوزىنىڭ ينستاگرامداعى پاراقشاسىندا ادامنىڭ بەت الپەتىنە قاراپ مىنەز- قۇلقىن اجىراتۋعا بولاتىندىعى تۋرالى جازدى.

ول ءوز پاراقشاسىندا "عىلىمي جۇمىستار جۇرگىزىپ، ادام تابيعاتىن زەرتتەۋشىلەردىڭ، كونەكوز قاريالاردىڭ بولجامى بويىنشا «ادامنىڭ بەتى - ىشكى جان- دۇنيەسىنىڭ ايناسى» - دەپ جازادى. ءبىز نازارلارىڭىزعا ءانشى جازعان مىنەزدەمەلەردى ۇسىنىپ وتىرمىز.

1. دوڭگەلەك ءجۇزدى ادام اينالاسىنا جايلى، توڭىرەگىندەگىلەرگە قولايلى جاعداي جاساي الاتىن جان. ولار تۋراشىل، ەڭبەكقور، جاقسى قاسيەتتەرى ۇنەمى كوبەيە تۇسەتىندەر.

2. ماڭدايى جالپاق، يەگى سۇيىرلەنىپ، ءۇشبۇرىشتانىپ كەلگەن ادامنىڭ ەستە ساقتاۋ قابىلەتى جاقسى، ءبىراق مىنەزى قۇبىلمالى. وتە سەزىمتال، سودان قولعا العان ىسىنەن تەز جالىعا سالاتىن كەزدەرى كوپ.

3. ات جاقتى كىسى جۇرتتى ءبىر ىسكە باستاۋعا يكەمدى، زيالى، ۇيىمداستىرۋ قابىلەتى مول. قاجىر- قايراتى، ەرىك- جىگەرى ءبىر باسىنا جەتكىلىكتى.

4. قىرىنان قاراعاندا تومپاق بەت بولىپ كورىنەتىن ادام قالجىڭقوي، اقجارقىن.

بەت- الپەتتىڭ جەكە بولىكتەرى بويىنشا:

5. كەڭ ماڭداي - اقىل- وي كەمەلدىلىگىنىڭ بەلگىسى.

6. تار ماڭدايلى ادام قۇنتتى، پىسىق.

7. ورتاشا ماڭداي - ەستى ادامنىڭ بەلگىسى.

8. جىڭىشكە قاس - تالعامپاز، كىرپياز، اشۋلانشاق جانعا ءتان.

9. ءتۇزۋ قاستىڭ يەسى - ەلگەزەك، ءتىل العىش.

10. قيىلعان قارلىعاش قاس - قيالشىل، ارمانشىل ادامدارعا بىتەدى.

11. ەكى قاستىڭ اراسى ءبىر- بىرىنەن الشاق تۇرسا، ونداي ادام باسقالاردىڭ ىقپالىنا تەز تۇسكىش.

12. قاستىڭ اراسى ءتۇيىسىپ تۇرسا، ول ادامنىڭ جۇيكەسى مىقتى.

13. دوڭگەلەك كوزدىڭ يەسى - كىم كورىنگەنگە سەنە سالاتىن اڭقاۋ.

14. قيىقشا كوز - زەرەكتىكتىڭ، ءتىپتى كەيدە قۋلىقشىلدىقتىڭ دا بەلگىسى.

15. قىسىق كوز - شۋلى جەردى ۇناتپايتىن كىسىكيىك جانداردا بولادى.

16. ۇلكەن مۇرىن - قىزبا، ۇرىنشاق، قىزۋقاندى ادامدارعا بىتەدى.

17. كىشكەنتاي مۇرىن - ومىردەن كوپ نارسە تالاپ ەتە بەرمەيتىن جانعا ءتان.

18. قۋسىرىلعان مۇرىن - اشۋلانشاق، ىزاقور ادامداردىڭكى.

19. جالپاق مۇرىن يەسى - قامسىز، ۋايىمسىز، سوزىندە تۇرا بەرمەيتىن كىسى.

20. ۇزىن مۇرىن - يەسىنىڭ قورقاق، ساق ەكەنىن تانىتادى.

21. كىشكەنتاي مۇرىندى ادام - جايدارى مىنەزدى.

22. مۇرىنى ورتاشا ادام - شىنشىل، سەنىمدى.

23. ۇلكەن اۋىز - اقكوڭىلدىلىكتىڭ جانە ەلدەن ەرەكشەلەنىپ كورىنۋگە قۇشتارلىقتىق بەلگىسى.

24. كىشكەنتاي اۋىز - ۋاق، ساراڭ، ءوزىمشىل ادامدارعا ءتان.

25. ۇزىن يەك - قىرسىقتىقتىڭ، قىسقا يەك - ۇشقالاقتىقتىڭ بەلگىسى.