اق ءتۇستىڭ ارتىقشىلىعى بار ما؟

استانا. قازاقپارات - اپپاق كيىم كيىنۋ سۇننەت بولىپ سانالا ما؟ بۇل جايلى قانداي حاديستەر بار؟

اللا ەلشىسىنىڭ (س. ع. س. ) اق جانە باسقا ءتۇستى كيىمدەر كيگەنى دەرەكتەردە ايتىلعان. سونداي-اق، پايعامبارىمىز (س. ع. س. ) بەلگىلى ءبىر ءتۇستى كيىم كيۋدى ءامىر ەتپەگەن. دەگەنمەن، اق ءتۇستى ەرەكشەلەپ ايتقان حاديستەرى بار. پايعامبارىمىز (س. ع. س. ) اق ءتۇستى ءتىرى جانە مارقۇم مۇسىلمانعا بىردەي قۇپ كورگەن. يبن ابباس (ر. ا. ): «اق ءتۇستى كيىمدەرىڭدى كيىڭدەر. راسىندا، ول - سەندەردىڭ ەڭ جاقسى كيىمدەرىڭ. جانە دە مايىتتەرىڭدى اق ماتامەن كەبىندەڭدەر[1]»، - دەگەن پايعامبار (س. ع. س.) ءحاديسىن ريۋايات ەتكەن.

 اق ءتۇستىڭ ايرىقشا بولۋىنىڭ سەبەبى سامۋرات (ر. ا. ) ريۋايات ەتكەن حاديستە بىلاي تۇسىندىرىلەدى: «اق ءتۇستى كيىمدەرىڭدى كيىڭدەر. ويتكەنى، ەڭ تازا، ەڭ ادەمىسى -  سول ءتۇس. جانە مارقۇمدارىڭدى اق ماتامەن كەبىندەڭدەر[2]».

اق ءتۇستى كيىم كىرشىكسىز تازالىقتىڭ بەلگىسى. ويتكەنى، اق كيىمگە تيگەن داق لەزدە بايقالادى. بۇل مۇسىلماننىڭ كيىمىن تازا ۇستاۋىنا مۇمكىندىك بەرەدى. ال، ەڭ ادەمىسى دەۋى اق تۇستەن تىنىشتىق پەن راقاتتىڭ لەبى ەسىپ تۇرادى. بۇل ءوز كەزەگىندە - كوپشىلىكتىڭ ادامعا دەگەن ءىلتيپاتىن تۋدىراتىن دۇنيە.

[1] تيرميزي

[2] ناساي