استانادا پاتەرىن جاسىرىن جالعا بەرگەندەردى جاڭا جۇيە ارقىلى انىقتاماق
تۇسكەن پايدانىڭ ءتيىستى مولشەرىن بيۋدجەتكە تولەمەي جۇرگەندەر ايىپپۇل تولەدى.
نۇرگۇل تۇرگەمبايەۆا 3 بولمەلى پاتەرىن جايلى جيھازىمەن جالعا بەرەدى. سول ارقىلى اي سايىن 100 مىڭ تەڭگە پايدا تابادى. سەبەبى ول جەكە كاسىپكەر رەتىندە تىركەلىپ، سالىقتان ەش جالتارعان ەمەس. ال ءتيىستى زاڭدى ەسكەرمەي، مۇلىگىن جالعا بەرىپ، بيۋدجەتكە شىعىن كەلتىرگەن پاتەر يەلەرى ءتۇسىمنىڭ 10 پايىزىن ءماجبۇرلى تۇردە بيۋدجەتكە تولەيدى. وعان قوسا، اكىمشىلىك قۇقىق بۇزعانى ءۇشىن حاتتاما تولتىرىلادى.
- ءبىزدىڭ قالامىز استانا بولعاسىن كوپ ادامدار كەلىپ جاتىر. قوناقتار كەلىپ جاتىر. جاس بالالار ءبارى جۇمىسقا كىرىپ، پاتەر ىزدەيدى. سول ءۇشىن مەن پاتەرىمدى جالعا بەرۋدى ويلادىم، دەيدى سالىق تولەۋشى نۇرگۇل تۇرگەمبايەۆا.
پايدانىڭ بار بولعانى 2 پايىزىن سالىق رەتىندە تولەپ، پاتەرىن نۇرگۇل سەكىلدى زاڭعا ساي جالعا بەرەتىندەر كوپ ەمەس. ياعني باسىم بولىگى كاسىبىن جاسىرىپ قالعاندى ءجون سانايدى. جالپى باس قالادا 5 مىڭ ادام پاتەرىن زاڭدى تۇردە جالعا بەرەدى. ءبىر عانا، الماتى اۋدانىندا وسىنداي 2800 كاسىپكەر بار. ءبىراق مۇندا سالىق تولەۋدەن جالتارىپ جۇرگەندەر سانى ودان 3 ەسە كوپ.
- جىلدىڭ باسىنان پاتەر جالعا بەرەتىن سالىق تولەۋشىنىڭ سانى 1415 انىقتالعان بولاتىن. سونىڭ ىشىندە 615 تەي سالىق تولەۋشى رەتىندە تىركەلدى. قالعانىمەن جۇمىس جاسالۋدا. جەكە كاسىپكەر رەتىندە تىركەلسە، تەك قانا 2 پايىز تولەيدى. نەمەسە 3 پايىز وڭايتىلعان دەكلاراتسيا بوينىشا. ەگەر جەكە كاسىپكەر رەتىندە تىركەلمەسە، جىل بويىنشا تابىلعان تابىستىڭ 10 پايىزىن تولەيدى. دەگەنمەن جەكە كاسىپكەر رەتىندە تىركەلگەن وڭاي بولىپ تابىلادى، دەدى استانا قالاسى الماتى اۋداندىق مەملەكەتتىك كىرىس باسقارماسىنىڭ باسشىسى قانات بالتابەكوۆ.
سالىق ورگاندارى پاتەردىڭ جالعا بەرىلگەنىن جاڭا جۇيە بويىنشا انىقتاۋعا كىرىستى. ءتىپتى بۇل زاڭدىلىقتى قاداعالاۋعا جەرگىلىكتى پوليتسەيلەر دە تارتىلدى.
اقپارات كوزى: 24.kz