كارىم ءماسىموۆ ابايدىڭ «جيدەباي- ءبورىلى» مۇراجايىنا باردى

استانا. قازاقپارات - كارىم ءماسىموۆ شىعىس قازاقستان وبلىسىنا جۇمىس ساپارى اياسىندا ابايدىڭ «جيدەباي- ءبورىلى» مەملەكەتتىك تاريحي- مادەني جانە ادەبي- مەموريالدىق قورىق- مۇراجايىنا باردى،

دەپ حابارلايدى pm.kz.

مەموريالدىق كەشەننىڭ ديرەكتورى بولات جۇنىسبەكوۆتىڭ ايتۋىنشا، مۇراجاي قازاقتىڭ ۇلى اقىنى، كورنەكتى اعارتۋشىسى اباي قۇنانبايەۆتىڭ ءومىرى مەن شىعارماشىلىعىنا بايلانىستى تاريحي ورىنداردى زەرتتەۋگە باعىتتالعان.

كارىم ءماسىموۆ بىرەگەي مەموريالدىق كەشەنىنىڭ ەكسپوناتتارىمەن تانىستى. مۇراجايدا تۋىسقاندارى مەن دوستارى ارقىلى ساقتالىپ قالعان اباي قۇنانبايەۆتىڭ جەكە زاتتارى كورسەتىلدى. مۇندا اراب، پارسى، تۇرىك، ورىس تىلىندە كىتاپتارى، ءار جىلداعى فوتوقۇجاتتارى، اقىننىڭ ءۇش ىشەكتى دومبىراسى، سيرەك كەزدەسەتىن جانە ءداستۇرلى تۇرمىستىق زاتتارى بار. كەشەندە كەلۋشىلەردى اباي زامانىن ەسكە تۇسىرەتىن ءتۇرلى جادىگەرلەر ساقتالعان. سونىمەن قاتار، ۇلى اقىننىڭ ميحاەليس، گروسس، دولگوپولوۆ، لوبانوۆسكي سىندى جەر اۋدارىلعان دوستارىمەن تۇسكەن فوتولارى ساقتالعان.

جالپى اۋدانى  6400 گ ا قۇرايتىن قورىق اۋماعىندا 16 تاريحي ەسكەرتكىش جانە تاريحي ورىندار ورنالاسقان. بۇل سەمەي قالاسىنداعى ابايدىڭ ادەبي مۇراجايى مەن احمەت ريزا مەدرەسەسى، م. اۋەزوۆتىڭ ءبورىلى جەرىندەگى مۇراجايى، كوكباي جاناتايەۆتىڭ اباي اۋدانىنىڭ اۋىلدىق وكرۋگى تاقىر كوكباي جەرىندەگى مۇراجايى، شاكىر ابەنوۆتىڭ اباي اۋدانى قۇندىزدى ەلدى مەكەنىندەگى مۇراجايى، اسەت نايمانبايەۆتىڭ ءۇرجار اۋدانىنداعى مۇراجايى.

 كارىم ءماسىموۆ مەموريالدى كەشەندى ارالاۋ بارىسىندا اۋداننىڭ قوعام وكىلدەرىمەن كەزدەستى. پرەمەر- مينيسترمەن اڭگىمە بارىسىندا كەزدەسۋگە قاتىسۋشىلار قازاقستانداعى ماڭىزى زور تاريحي- مادەني مۇرا نىساندارىن دامىتۋ جانە ساقتاۋ تۋرالى ماسەلەنى قوزعادى. قر پرەمەر- ءمينيسترىنىڭ الدىندا ابايدىڭ ۇرپاعى ب. ماناتاي، اباي اۋدانىنىڭ سپورت ارداگەرى م. مۇقانوۆ، اباي اۋدانىنىڭ قۇرمەتتى ازاماتى ا. تولەۋبەك، وقۋشى- وليمپيادالاردىڭ جەڭىمپازى د. ۋاليبەكوۆ ءسوز سويلەدى. جولسىزدىق، اباي ماۆزولەيىن جانە سەمەي اۋەجايىن جوندەۋ ماسەلەلەرى كوتەرىلدى.

انىقتاما ءۇشىن:

اباي 1904 -جىلى بالاشاقپاق جەرىندە دۇنيەدەن وتكەن. ول جيدەبايدا ءىنىسى وسپاننىڭ قاسىنا جەرلەنگەن بولاتىن. بۇل ورىنعا ساۋلەتشى بەك يبرايەۆتىڭ ازىرلەۋىمەن كەسەنە كەشەنى سالىنعان. ونىڭ اشىلۋى 1995 -جىلى قازاقتىڭ ۇلى اقىنى اباي قۇنانبايەۆتىڭ 150 جىلدىعىنا ارنالعان مەرەيتويىندا ءوتتى. كەشەننىڭ اشىلۋ سالتاناتىنا قازاقستان پرەزيدەنتى نۇرسۇلتان نازاربايەۆ جانە تاتارستان پرەزيدەنتى مينتيمەر شايميەۆ، سونداي- اق يۋنەسكو كوميتەتىنىڭ ءتوراعاسى فەدەريكو مايور ساراگوسا قاتىسقان ەدى. 1970 -جىلى اقىننىڭ 125 جىلدىق مەرەيتويى قارساڭىندا مۇراجاي جوندەۋدەن وتكەن. عيماراتتىڭ ساۋلەتتىك كورىنىسى باستاپقى كۇيىندەگى ءتۇرىن ساقتاپ قالدى. مۇراجاي- ءۇيى 1940 -جىلى سەمەي قالاسىندا اشىلعان.