يۆان دىچكونىڭ ريودا العاشقى كەزدەسۋىن قاي بوكسشىمەن وتكىزەتىنى بەلگىلى بولدى
بۇل تۋرالى ريودا جۇرگەن قازاقپارات ءتىلشىسى حابارلادى.
بۇگىن ريو- دە- جانەيرودا ءوتىپ جاتقان ХХХІ وليمپيادا ويىندارىندا بوكستان اسا اۋىر سالماقتا ەل نامىسىن قورعايتىن سپورتشىمىز يۆان دىچكونىڭ العاشقى قارسىلاسى انىقتالدى.
ول 1/8 فينالدا ءازىربايجاندىق ماگومەدراسۋل مەدجيدوۆپەن كەزدەسەتىن بولدى.
دىچكو العاشقى اينالىمنان بوساتىلعان بولاتىن. بۇگىن +91 كەلى سالماق دارەجەسى بويىنشا وتكەن ىرىكتەۋ كەزەڭىندە ءازىربايجاندىق ماگومەدراسۋل مەدجيدوۆ ماروككالىق مۇحاممەد ءاردجاۋيدى ايقىن باسىمدىقپەن جەڭدى. وسى جۇپتىڭ جەڭىمپازى ەندى قازاق بوكسشىسىنا قارسى جۇدىرىقتاسادى.
قوس قارسىلاس اراسىنداعى جەكپە- جەك 14 -تامىز كۇنى استانا ۋاقىتىمەن 4:45 تە باستالادى.
ەستەرىڭىزگە سالا كەتەيىك، دىچكونىڭ بۇل قارسىلاسى وزىنە وتە جاقسى تانىس. 2013 -جىلى بوكستان الماتىدا وتكەن الەم چەمپيوناتىندا ماگومەدراسۋل مەدجيدوۆ يۆان دىچكونى نوكاۋتپەن جەڭىپ، الەم چەمپيونى اتاعىنا قول جەتكىزگەن بولاتىن. ەندى جەرلەسىمىزگە سول كەتكەن ەسەنى قايتارۋعا ۇلكەن مۇمكىندىك تۋىپ وتىر.
لوندوندا قورجىنىمىزعا قولا جۇلدە سىيلاعان الىبىمىز بيىل ودان دا جاقسى ناتيجە كورسەتەدى دەگەن ۇمىتتەمىز.
يۆان دىچكو
تۋعان كۇنى: 11.08.1990
سالماعى: +91 كەلى
تۋعان جەرى: قوستاناي وبلىسى.
باپكەرى: شايرەر ۆلاديمير، ساپابەك مۇقىشەۆ.
جەتىستىكتەرى:
2008 -جىلى - جاستار اراسىنداعى الەم چەمپيوناتىنىڭ كۇمىس جۇلدەگەرى؛
2010 -جىلى - ازيا ويىندارىنىڭ قولا جۇلدەگەرى؛
2011 -جىلى - الەم چەمپيوناتىنىڭ قولا جۇلدەگەرى؛
2013 -جىلى - الماتىدا وتكەن بوكستان الەم چەمپيوناتىنىڭ كۇمىس جۇلدەگەرى؛
2013 -جىلى - ازيا چەمپيونى؛
2012 -جىلى - XXX جازعى وليمپيادا ويىندارىنىڭ قولا جۇلدەگەرى؛
حالىقارالىق دارەجەدەگى سپورت شەبەرى.
قازاقستان بوكسىندا اسا اۋىر سالماقتا بوكسشىلار وتە تاپشى. سول ولقىلىقتىڭ ورنىن سەزدىرمەي جۇرگەن قوستانايلىق تارلانىمىز تالاي سىندارلى سايىستاردا ەل نامىسىن ابىرويلى قورعاپ كەلەدى.
ەندى ريو تورىندە اسا اۋىر سالماق دارەجەسىندەگى جالعىز ءۇمىتىمىز دىچكو قالايدا ءبىر مەدالعا تالاسا الادى دەگەن سەنىمدەمىز. ءبىزدىڭ بوكسشىلاردىڭ قاي- قايسىسىن الىپ قاراساقتا جەڭىسكە لايىقتى. سوندىقتان، قازاق ەلى ريوعا اتتانىپ بارا جاتقان بارلىق وتانداستارىنان تەك جەڭىس كۇتەدى. ساتتىلىك تىلەيمىز...
اۆتور: كۇنسۇلتان وتارباي