الماتىدا كوكتوبەنىڭ ساياباعىنا كىرۋ تەگىن بولدى
04:07, 07 - تامىز 2016
الماتى. قازاقپارات - الماتىدا كوكتوبەدەگى ساياباق ايماعىنا كىرۋ اقىسى الىنىپ تاستالدى.
بۇل تۋرالى الماتى قالاسى اكىمىنىڭ باسپا ءسوز قىزمەتىنەن حابارلادى.
«كوكتوبەدەگى ساياباق ايماعىن سەنىمگەرلىكپەن باسقارۋ قۇقىعى بەرىلگەن جەكە كومپانيا وسى ايماققا كىرۋ اقىسىن جويدى. بۇل تۋرالى اتالعان كومپانيا باسشىلىعى كەشە - جۇما كۇنى قالا اكىمدىگىنە ءمالىم ەتتى»، - دەلىنگەن حابارلامادا.
وسى قىزمەت كورسەتۋشى كومپانيا باسشىلىعىنىڭ بۇيرىعىنا سايكەس، 28 -شىلدەدەن باستاپ، ساياباق اۋماعىنا جاياۋ كىرۋ اقىسى كۇشىن جويدى. ول - 100 تەڭگە بولاتىن. ءسويتىپ، بۇل ساياباق اۋماعى بارلىق ساناتتاعى تۇرعىندارعا قول جەتىمدى بولدى.
كومپانيا باسشىلىعى بۇل ساياباقتىڭ ينفراقۇرىلىمىن قايتا ۇيىمداستىرۋعا بايلانىستى جاسالىپ وتىرعانىن ايتتى.
دەگەنمەن، ارنايى اۆتوبۋستاردان جەكە اۆتوكولىكتەردىڭ كىرۋىنە تىيىم سالىنعان.
اۆتور: ايبوتا جاپپاربەرگەن