بايان ەسەنتايەۆانىڭ جاعدايى قازاق ايەلدەرىنىڭ قورعانسىز ەكەنىن دالەلدەدى
بۇل تۋرالى aktobenews.kz جازادى.
اقتوبەدەگى ۇكىمەتتىك ەمەس ۇيىمدار اسسوتسياتسياسىنىڭ ءتوراعاسى ايگۇل دۇيسەنوۆانىڭ ايتۋىنشا، تۇرمىستا زورلىق-زومبىلىق كورگەن ايەلگە پسيحولوگيالىق قولداۋ دا، پروبلەماسىن زاڭ جۇزىندە قالاي شەشۋگە بولاتىنى تۋرالى كەڭەس تە بەرىلۋ كەرەك.
- وتباسىندا ءزابىر كورگەن ءار ايەلگە تىعىرىقتان شىعۋدىڭ جولى بارىن، قوعامنىڭ كوزقاراسىنان قورىقپاي، زاڭ شەڭبەرىندە ماسەلەسىن شەشۋگە تالپىنۋ كەرەكتىگىن ماماندار ءتۇسىندىرۋ كەرەك. وتباسى - مەملەكەتتىڭ ءبىر بولشەگى. مەملەكەتتىڭ ىرگەسى بەرىك بولۋى ءۇشىن ەلدە وتباسىلىق ينستيتۋت قاعيداسىن جەتىلدىرۋىمىز، دارىپتەۋىمىز كەرەك، - دەيدى ايگۇل دۇيسەنوۆا.
جالپى قوعامدا ايەلدەردىڭ زورلىق-زومبىلىقتان جاپا شەگۋى، ونىڭ ىشىندە ءوز ۇيىندە وتاعاسىنان، جىگىت بولعان بالاسىنان تاياق جەۋى - ادام قۇقىعىن اياق استى ەتۋدىڭ ەڭ كوپ تاراعان ءتۇرى.
- بۇل ءبىر جاعىنان تۇسىنىكتى دە. سەبەبى ءبىزدىڭ قوعامنىڭ قالىپتاسقان مەنتاليتەتى وتباسىن سىرتتان ەشكىمنىڭ ارالاسۋىنا جول بەرمەيتىن «جابىق ۇيىم» رەتىندە قابىلدايدى. سانامىزعا وسىلاي ءسىڭىپ كەتكەندىكتەن، «وتباسىنداعى ارازدىقتى وتباسى مۇشەلەرى ءوزارا شەشۋى ءتيىس» دەپ كوپ جاعدايدا قۇقىق قورعاۋ ورگاندارى دا، جاقىن تۋىسقاندارى دا ارالاسۋعا، اراشا تۇسۋگە قۇلىقتى بولمايدى. - دەيدى وبلىستىق ىشكى ىستەر دەپارتامەنتىنىڭ زورلىق- زومبىلىقتان قورعاۋ توبىنىڭ ينسپەكتورى مارينا نۇرىمجانوۆا.
ايەلدى نەمەسە بالانى ءوز پروبلەماسىمەن جالعىز قالدىرۋ دەنى ساۋ قوعامنىڭ ءىسى ەمەس، مەملەكەتتىك ورگانداردىڭ، كورشى- كولەمنىڭ تاراپىنان قولداۋعا، قورعاۋعا باعىتتالعان ارەكەتتەر جاسالۋى ءتيىس.
- وتباسىنداعى جانجالدىڭ كەسىرىنەن بولاتىن قىلمىستاردىڭ جيىلەپ كەتۋىنە قوعام الاڭداۋى كەرەك.
ۇنەمى جۇدىرىق جۇمسايتىن كۇيەۋىنە اياۋشىلىق تانىتىپ، ارىزىن كەيىن قايتارىپ الاتىن ايەلدەر ءوز ومىرلەرىن، دەنساۋلىقتارىن ويلاۋعا شاماسى كەلە بەرمەيدى. ونداي ايەلدەر كوبىنەسە پسيحولوگيالىق جانە ماتەريالدىق تۇرعىدا كۇيەۋلەرىنە تاۋەلدى بولىپ كەلەدى.
نەگىزىنەن ەرىك- جىگەرى ءالسىز ەركەكتەر ايەلدەرىنە قول كوتەرەدى.
ايەلىن ۇراتىن ەركەك ايەلىنىڭ باسقان ءىزىن اڭديتىن قىزعانشاق، قاتىگەزدىكتى كورسەتەتىن فيلمدەرگە اۋەس جانە ءوزى بالاعا دا، جان- جانۋارعا دا قاتىگەز، كوڭىل- كۇيى كەنەتتەن وزگەرۋگە بەيىم بولىپ كەلەدى. كوبىنەسە ءوز پروبلەماسىنا وزگەنى كىنالى سانايدى.
ونداي ەركەكتىڭ ايەلى بولعان ادامنىڭ ءومىرى بارا- بارا توزاققا اينالادى. ۇرەي، شەكتەن شىققان ساقتىق، كەز- كەلگەن جاعدايدا ابدىراۋ، ابىرجۋ، قورعانسىزدىق، ۇمىتسىزدىك جانە شاراسىزدىق، ۇنەمى وزىنە تونەتىن ءقاۋىپتى ويلاپ ۋايىمداۋ، قاراپتان- قاراپ ءوزىن كىنالى سەزىنۋ، وزىنە دەگەن سەنىمسىزدىك، جابىرقاۋ، تورىعۋ سەزىمدەرى
اقىرىندا ايەلدىڭ نە ءوز- وزىنە قول جۇمساۋىنا، نە ىشىمدىككە سالىنۋىنا اكەلىپ سوعۋى مۇمكىن.
بۇل جەردە ءاربىر ايەل قوعامنىڭ كوزقاراسى ەمەس، ءوز ءومىرى ءۇشىن ءوزىنىڭ جاۋاپكەرشىلىگى ماڭىزدى ەكەنىن ۇعىنىپ، جىلداردى وتكىزىپ الماي شەشىم قابىلداۋى كەرەك، - دەيدى پسيحولوگ ليدا ەسەنعاليەۆا.
ەسكە سالساق، ماۋسىمنىڭ 10 ى كۇنى جۇبايى قاتتى سوققىعا جىعىپ، پىشاق جۇمساعاننان كەيىن بايان ەسەنتايەۆا اۋرۋحاناعا ءتۇستى. وسى وقيعانى سان-ساققا جۇگىرتكەن جۇرت «جۇلدىزداردىڭ دا باسىنا قاراپايىم ايەلدىڭ كۇنى تۋادى ەكەن-اۋ» دەپ پايىمدادى. ءتىپتى، بۇل جاعداي مەملەكەتتىك حاتشى گۇلشارا ءابدىحالىقوۆانىڭ دەڭگەيىندە ايتىلىپ، قازاق قوعامىندا ايەلدەردىڭ قۇقى، دەنساۋلىعى جەتكىلىكتى قورعالمايدى دەگەن پىكىر تۋعىزعان بولاتىن.