استانادا ءتۇرلى ماماندىق يەلەرىنە جۇمىسقا ورنالاسۋعا كومەك كورسەتىلۋدە

استانا. قازاقپارات - «جاستار» سارايىندا كەزەكتى بوس جۇمىس ورىندارى جارمەڭكەسى وتكىزىلدى.

شاراعا قىزمەت كورسەتۋ، ءبىلىم، دەنساۋلىق ساقتاۋ، قۇرىلىس جانە ت. ب. سالالارداعى 60 جۋىق جۇمىس بەرۋشى قاتىستى، دەپ جازادى astana.gov.kz.

جارمەڭكەنىڭ باستى ەرەكشەلىگى - ارنايى ترەنينگتەردىڭ وتكىزىلۋى، شارانى ۇيىمداستىرۋشىلار جۇمىس ىزدەۋشىلەرمەن سۇحباتتاسۋدان تابىستى ءوتۋدىڭ قۇپيالارىمەن ءبولىستى. جۇمىسپەن قامتۋ ورتالىعىنىڭ باسشىسى ولجاس ومار ءبىرىنشى كەزەكتە جاستارعا كونسۋلتاتسيالار بەرىلەتىنىن اتاپ ءوتتى. ولارعا جۇمىستى قالاي ىزدەۋ كەرەك ەكەندىگى، سۇحباتتاسۋدان ءوتۋ، جۇمىس بەرۋشىمەن اڭگىمەلەسۋ جاعدايلارى تۇسىندىرىلەدى.

«بۇگىن سەگىزىنشى بوس جۇمىس ورىندارى جارمەڭكەسىن وتكىزىپ جاتىرمىز. شاراعا 60 قا جۋىق جۇمىس بەرۋشى قاتىسۋدا، 300 گە جۋىق بوس جۇمىس ورنى ۇسىنىلادى. كەلەسى جارمەڭكە 11 -تامىز كۇنى ءبىلىم سالاسىنداعى بوس جۇمىس ورىندارى جارمەڭكەسى وتكىزىلەدى»، - دەدى ول.

جالپى، جىل باسىنان بەرى جۇمىسپەن قامتۋ ورتالىعىنا 8 مىڭعا جۋىق ادام حابارلاسقان. 4 مىڭعا جۋىق ادام تۇراقتى جۇمىسپەن قامتىلدى، 400 جۋىق تۇلەك جاستار پراكتيكاسىنان ءوتىپ جاتىر. 600 جۋىق ادام قايتا دايارلانۋدا.

«مەن پلاستيك تەرەزەلەر مونتاجداۋشىسى بولىپ ىستەپ ءجۇرمىن. ءبىراق بۇل جۇمىس وزىمە ۇنامايدى. جارمەڭكەگە باسقا جۇمىس تابۋ ءۇشىن كەلدىم. كەشە جۇمىسپەن قامتۋ ورتالىعىندا بولىپ، جارمەڭكە وتكىزىلەتىنى تۋرالى ەستىدىم. تۇيىندەمەمدى تاپسىردىم، ەندى سۇحباتتاسۋعا بارامىن»، - دەيدى قالا تۇرعىنى ابزال ەردەنبايەۆ.