قازاقستان مەن رەسەيدىڭ قورعانىس مينيسترلەرى اسكەري- تەحنيكالىق ىنتىماقتاستىق سالاسىنداعى جاڭا كەلىسىمگە قول قويدى

استانا. قازاقپارات - قازاقستان رەسپۋبليكاسىنىڭ قورعانىس ءمينيسترى يمانعالي تاسماعامبەتوۆ پەن رەسەيدىڭ قورعانىس ءمينيسترى سەرگەي شويگۋدىڭ اراسىندا كەلىسسوز ءوتتى.

مينيسترلىكتىڭ باسپا ءسوز قىزمەتىنىڭ حابارلاۋىنشا، كەلىسسوز بارىسىندا تاراپتار جاقىن اراداعى بولاشاقتا ءوزارا ءىس- قيمىل ماسەلەلەرىن، سونداي- اق، ەكىجاقتى اسكەري جانە اسكەري- تەحنيكالىق ىنتىماقتاستىقتىڭ وڭ سەرپىنىن اتاپ ءوتىپ، قورعانىس سالاسىنداعى ءبىرقاتار ماسەلەلەردى تالقىلادى.

 رەسەي فەدەراتسياسىمەن اسكەري- تەحنيكالىق ىنتىماقتاستىق شەڭبەرىندە قازاقستان مەن رەسەي پرەزيدەنتتەرىنىڭ ۋاعدالاستىعى نەگىزىندە ءبىزدىڭ تاراپقا 5 دانا س-300 زەنيتتىك زىمىران كەشەنى بەرىلدى. ودان باسقا، رەسەي تاراپى وسى كەشەندەرگە 170-تەن اسا زەنيتتىك زىمىرانداردى تاپسىرۋ جونىندەگى مەملەكەت ىشىلىك پروتسەدۋرانى رەسىمدەۋدى اياقتاۋدا.

ۇ ق ش ۇ شەڭبەرىندە مۇشە مەملەكەتتەر اراسىندا اسكەري ماقساتتاعى ءونىمدى ترانزيتتەۋ جانە اسكەري تاسىمالداۋلاردى جۇزەگە اسىرۋ ءتارتىبىن جەڭىلدەتۋگە مۇمكىندىك بەرەتىن مەملەكەت ارالىق كەلىسىم جاساسۋ بويىنشا ماسەلە قارالدى.

مۇنداي كەلىسسوزدەردىڭ ماڭىزدى ناتيجەلەرى رەتىندە ق ر مەن ر ف قورعانىس ۆەدومستۆولارىنىڭ توراپتى بىرلەسىپ پايدالانۋعا كوشۋدى، قازاقستاندىق مامانداردى وقىتۋ جانە بۇدان بۇرىن رەسەي تاراپىمەن پايدالانىلعان جەر تەلىمىنىڭ شەكارالارىن قىسقارتۋدى كوزدەيتىن زىمىراننىڭ شابۋىلى تۋرالى الدىن الۋ جۇيەسىندە بالقاش تورابىن تاپسىرۋ جانە پايدالانۋدىڭ جاڭا شارتتارىن ايقىنداۋ تۋرالى كەلىسىمنىڭ بەكىتىلۋىن ويداعىداي دەپ اتاپ وتۋگە بولادى.

 «اسكەري- تەحنيكالىق ىنتىماقتاستىق سالاسىندا ءبىزدىڭ ءارى قارايعى جۇمىسىمىزدىڭ جاڭا شەڭبەرىن، جاڭا شەكاراسىن اشاتىن كەلىسىمگە قول قويدىق»، - دەدى يمانعالي تاسماعامبەتوۆ رەسەي قورعانىس ۆەدومستۆوسىنىڭ باسشىسىمەن كەلىسسوزدەن كەيىن.

 وتكەن جىلدان باستاپ اسكەري- تەحنيكالىق ىنتىماقتاستىق تۋرالى قازاقستاندىق- رەسەيلىك شارت قولدانىسقا ەنگىزىلگەنىن ايتا كەتكەن ءجون. اتالعان شارتتىڭ تەتىگى قارۋلى كۇشتەرىمىزگە رەسەيلىك ارمياسىنا سەكىلدى قۇنى مەن جيناقتالۋى بويىنشا ءبىرقاتار زاماناۋي قارۋ- جاراقتىڭ جەتكىزىلۋىنە مۇمكىندىك بەردى. بۇل سۋ- 30 س م جويعىشتارى، مي-171ش پەن مي-35 اسكەري- كولىكتىك جانە جاۋىنگەرلىك تىكۇشاقتارى، راديوتەحنيكالىق بارلاۋ جانە مونيتورينگىلەۋ قۇرالدارى، سونداي- اق، وزگە دە قارۋ- جاراق.