اتىراۋ وبلىسىنىڭ اكىمى ن. نوعايەۆتىڭ سۇراعىنا اكىمدىك قىزمەتكەرلەرى جاۋاپ بەرە المادى

استانا. قازاقپارات - بۇگىن اتىراۋ وبلىسىنىڭ اكىمى نۇرلان نوعايەۆتىڭ قاتىسۋىمەن وتكەن وتىرىستا كاسىپكەرلىكتى دامىتۋ جانە اۋىلشارۋاشىلىق باسقارماسىنىڭ باسشىلىعى مەملەكەتتىك قولداۋ ارقىلى قۇرىلعان شارۋاشىلىقتاردا قانشا جۇمىس ورنى اشىلدى دەگەن سۇراققا جاۋاپ بەرە المادى.

ساۋالىنا جاۋاپ الا الماعان ن. نوعايەۆ باسقارمالار اراسىندا بايلانىستىڭ جوقتىعىن ايتىپ، قاراماعىنداعى قىزمەتكەرلەردى قاتتى سوكتى.

«اشىلعان جۇمىس ورىندارى تۋرالى اقپاراتتى ءبارىڭىز ءبىلىپ وتىرۋىڭىز كەرەك. جاۋاپكەرشىلىكتەن قاشىپ، جۇمىستارىڭىزدىڭ اياسىن شەكتەپ وتىرسىزدار. ءاربىر باسقارما بولەك الەمدە ءومىر ءسۇرىپ جاتقانداي. بيۋدجەتتەن بولىنگەن اقشانىڭ باستى ماقساتى - جۇمىس ورىندارىن اشۋ. كاسىپكەرلىك باسقارماسى اقشانىڭ قالاي جۇمسالىپ جاتقانىن بىلمەسە، جۇمىس ورنىمەن قامتۋ باسقارماسى قانشا جۇمىس ورنىنىڭ اشىلىپ جاتقانىن بىلمەسە، اۋىل شارۋاشىلىق باسقارماسى ءوز الدىنا حابارسىز بولسا، نە ءۇشىن جۇمىس ىستەپ جاتىرمىز؟ ءبىزدىڭ ماقساتىمىز اقشا ءبولۋ ەمەس، جۇمىس ورنىن اشۋ، ەكونوميكانى دامىتۋ. بولىنگەن اقشانىڭ قالاي پايدالانىلىپ جاتقانىن قاداعالاۋ كەرەك. باسقارمالار اراسىندا بايلانىس بولسىن»، - دەدى نۇرلان نوعايەۆ.

ايماق باسشىسى ايتىلعانداردى ەسكەرە وتىرىپ، اشىلعان جوبالاردىڭ جۇمىسىن ءجىتى باقىلاپ وتىرۋدى تاپسىردى. سونىمەن قاتار، باسقارمالار اراسىندا تىعىز بايلانىستىڭ بولۋىن قاداپ ەسكەرتتى.

ايتا كەتەلىك، سوڭعى 4 جىلدا اتىراۋ وبلىسىندا اۋىل شارۋاشىلىعىن قارجىلاي قولداۋ قورى ارقىلى جەرگىلىكتى بيۋدجەتتەن 807 ميلليون تەڭگە ءبولىندى. بۇل قارجى شارۋالارعا جىلدىق مولشەرلەمەسى 7 پايىز بولاتىن قايتارىمدى نەسيە تۇرىندە بەرىلدى. ناتيجەسىندە، قازىر 163 جوبا ماقۇلدانىپ وتىر.

اۆتور: قانات مامەتقازى ۇلى