اقمولالىق قازاق قىزىنڭ كۋالىگىنە تۋعان جەرى قازاقستان ەمەس، «كاز س س» دەپ جازىلىپ كەتكەن
ونىڭ اتى-ءجونى - جانۇزاق سارا. سول كەزدە تاۋەلسىزدىك العانىنا 10 جىل تولعان قازاقستان رەسپۋبليكاسىنىڭ ازاماتشاسى ساراعا ەرەيمەنتاۋ اۋدانىڭ ادىلەت باسقارماسى «كاز س س ر» - دا تۋدى دەپ، كۋالىك بەرگەن. ماسقارا!
سارانىڭ تۋۋ تۋرالى كۋالىگىندەگى بۇل ورەسكەل قاتەنى نە مەكتەپ، نە اتا-انا، نە سول ادىلەت باسقارماسى، نە اۋرۋحانا بايقاماعان. ارادا 14 جىل وتكەندە، 2015 -جىلى ساراعا جول ءجۇرۋ بيلەتىن الايىن دەپ تۇرعان ءبىر تۋىسقانى عانا بالانىڭ تۋعان جەرى قازاقستان ەمەس، كاز س س ر دەپ تۇرعانىن بايقاپ، تاڭقالعان. تۋۋ تۋرالى كۋالىكتى ينتەرنەتكە جۇكتەگەننەن كەيىن سارانىڭ اتا-اناسى ادىلەت باسقارماسىنا بارعان، ەكى جىلدان بەرى تۋۋ تۋرالى كۋالىك ازاماتتىق حال اكتىلەرى جازبالارى (ا ح ا ج) بولىمىندە بەرىلەتىندىكتەن، ساراعا ولەڭتى اۋىلىنىڭ ا ح ا ج ءبولىمى جاڭا كۋالىك جاساپ بەرگەن ەكەن.
«بۇل بالاعا قايتادان جاڭا تۋۋ تۋرالى كۋالىك بەرىلگەن. ول جەردە تەحنيكالىق قاتە كەتكەن. ياعني، ادامي فاكتور... تۋۋ تۋرالى كۋالىكتەگى قاتەنى اتا-اناسى دا بايقاماعان. بالانىڭ ءبىر تۋىسقانى جول جۇرۋگە بيلەت الىپ جاتىپ، تۋۋ تۋرالى كۋالىكتەگى قاتەنى بايقاعان جانە اتا-اناسىنىڭ رۇقساتىنسىز ونى سۋرەتكە ءتۇسىرىپ، ينتەرنەتكە جۇكتەگەن. وسىلايشا، سۋرەت العاش رەت جۇكتەلگەن 2015 -جىلى اتا-اناسى ا ح ا ج بولىمىنە بارىپ، جاڭا تۋۋ تۋرالى كۋالىك العان. ال، رەسپۋبليكاسىنىڭ اتى كاز س س ر دەپ جازىلعان كۋالىكتى ەرەيمەنتاۋ اۋدانى ادىلەت باسقارماسى بەرگەن. قازىر ول كۋالىك ارحيۆتە جاتىر»، - دەيدى ءمان-جايدى تۇسىندىرگەن ەرەيمەنتاۋ اۋدانى اكىمدىگىنىڭ ىشكى ساياسات ءبولىمىنىڭ قىزمەتكەرى كاميلا احمەدياروۆا.
بۇل قاتەنى جىبەرگەن ادام 2014 -جىلى جۇمىستان شىعىپ كەتكەن، سوندىقتان وعان جازا قولدانباعان. ءبىز سارامەن الداعى ۋاقىتتا حابارلاسىپ، «كاز س س ر» - دا تۋعان قىزدىڭ قازىر قايدا وقيتىنىن، جالپى، بۇل كۋالىكتىڭ بار «قىزىعىن» تولىق جازامىز.
اۆتور: كەنجەكەي توقتامۇرات قىزى