ءبىلىم مينيسترلىگى مەكتەپتە سمارتفونعا تىيىم سالۋعا قاتىستى پىكىر ءبىلدىردى
«قازاقپارات» ح ا ا- ءنىڭ رەسمي ساۋالىنا قاتىستى بەرگەن جاۋابىندا ق ر ءبىلىم جانە عىلىم مينيسترلىگى ءبىلىم بەرۋ ۇيىمدارى قازاقستان رەسپۋبليكاسىنىڭ زاڭناماسىندا، ءتيىستى ۇلگىدەگى ءبىلىم بەرۋ ۇيىمدارىنىڭ قىزمەتى تۋرالى ۇلگىلىك ەرەجەلەر مەن ءبىلىم بەرۋ ۇيىمدارىنىڭ جارعىلارىندا بەلگىلەنگەن شەكتەردە وقۋ جانە تاربيە پروتسەسىن جۇزەگە اسىرۋدا، كادرلاردى ىرىكتەۋ مەن ورنالاستىرۋدا، عىلىمي، قارجى- شارۋاشىلىق جانە وزگە دە قىزمەتتە دەربەس بولاتىندىعىن اتاپ ءوتتى.
مينيسترلىكتىڭ جازۋىنشا، سمارتفوندارعا تىيىم سالۋعا قاتىستى شەشىمدى وقۋشىلاردىڭ اتا- انالارى بىرلەسىپ شەشە الادى.
«ءبىلىم بەرۋ ۇيىمدارىنىڭ قۇزىرەتىنە ىشكى ءتارتىپ ەرەجەلەرىن ازىرلەۋ جانە بەكىتۋ فۋنكسيالارى كىرەدى. وسىلايشا، اتا- انالار كەڭەسىندە سمارتفونداردى مەكتەپتە قولدانۋعا تىيىم سالۋعا قاتىستى ماسەلەنى تالقىلاپ، بارلىق پىكىرلەردى سارالاي وتىرىپ، وسى ماسەلەنى ىشكى ءتارتىپ پەن ۇيىم جارعىسىنا ورتاق ۇيعارىمدى ەنگىزۋ ارقىلى شەشۋگە بولادى»، - دەلىنگەن حابارلامادا.
دەگەنمەن، ءبىلىم جانە عىلىم مينيسترلىگى اتالعان پەرسونالدى كومپيۋتەردىڭ قىزمەتىن اتقاراتىن مۇنداي گادجەتتەردىڭ ءبىلىم قۋۋعا قاجەت پايدالى فۋنكسيالارى: ەلەكتروندى پوشتامەن جۇمىس، ماتىندىك جانە ەلەكتروندى قۇجاتتاردى قاراۋ مۇمكىندىگى بارىن دا تىلگە تيەك ەتتى.
«قازاقپاراتقا» حابارلاعانىنداي، سمارتفونداردى مەكتەپتەردە قولدانۋعا قاتىستى تىيىمدى ەنگىزۋ تۋرالى ماسەلە قاراستىرىلماعان.
ەسكە سالا كەتسەك، شىمكەنت اكىمى عابيدۋللا ءابدراحيموۆ مەكتەپتەردە وقۋ جىلىندا وقۋشىلاردىڭ سمارتفون قولدانۋىنا تىيىم سالۋدى تاپسىرعان بولاتىن.
مۇنداي ۇسىنىستى قوستاناي جانە قىزىلوردا وبلىسىنىڭ پروكۋرورلارى دا جاسادى.
پروكۋرورلار سمارتفونداردى قولدانۋ ءبىلىم بەرۋ پروتسەسىنە كەرى اسەرىن تيگىزەدى دەپ ەسەپتەپ وتىر.
سونىمەن قاتار، بالالاردىڭ ومىرىنە دە قاۋىپ توندىرەدى.
قىزىلوردا وبلىسىندا پروكۋراتۋرا قىزمەتكەرلەرى «ۆكونتاكتە» جەلىسىن تەكسەرۋ بارىسىندا وزىنە قول جۇمساۋدى ۇگىتتەيتىن پاراقشالارعا 106 جەتكىنشەك قاتىساندىعىن انىقتاعان. موبيلدى بايلانىستىڭ كەرى اسەرىمەن قاتار، مەكتەپ قابىرعاسىندا قىمبات تەلەفونداردىڭ ۇرلىعى دا ءورشىپ تۇر. نەگىزىنەن، مەكتەپتەردە ورىن الاتىن قىلمىستاردىڭ 65 پايىزىنا ۇيالى تەلەفون سەبەپ بولاتىن كورىنەدى.