ماسكەۋدە ءبىرتۋار تۇلعا ءاليحان بوكەيحانوۆتىڭ قابىرىنە ەستەلىك تاقتايشا قويىلادى
بۇل تۋرالى بۇگىن الماتىدا ءاليحان بوكەيحانوۆتىڭ 150 جىلدىعىنا ارنالعان ەكسپەديتسياعا قاتىسۋشى، فيلولوگيا عىلىمدارىنىڭ دوكتورى ايگۇل ىسماقوۆا ءاليحان بوكەيحانوۆتىڭ مۇراسىن زەرتتەۋگە ارنالعان دوڭگەلەك ۇستەل بارىسىندا مالىمدەدى.
«قازىر زيراتتاعى باۋىرلاستار قابىرىندە ءاليحان بوكەيحانوۆ پەن نىعمەت نۇرماقوۆقا ارنالعان ورتاق تاقتايشا بار. ءبىز دون زيراتىنىڭ باسشىلىعىمەن سويلەسىپ، كەلىسىمگە قول جەتكىزدىك. بيىل كۇزگە قاراي، ءاليحان بوكەيحانوۆقا ارناپ بولەك تاقتايشا ورناتۋدى جوسپارلاپ وتىرمىز. ول قازاق جانە ورىس تىلىندە جازىلادى. ويتكەنى، ماسكەۋلىكتەر دە ءاليحان بوكەيحانوۆتىڭ كەزىندە مەملەكەتتىك دۋمانىڭ مۇشەسى بولعانىن بىلۋلەرى كەرەك»، - دەدى ايگۇل ىسماقوۆا.
سونىمەن قاتار، ونىڭ ايتۋىنشا، ەكسپەديتسياعا قاتىسۋشىلار ءاليحان بوكەيحاننىڭ ماسكەۋدە ۇلكەن كيسلوۆسكي كوشەسىندە تالاي جىل تۇرعان ۇيگە دە ەستەلىك تاقتا ورناتۋعا كۇش سالادى.
«وكىنىشكە قاراي، قاراعاندىدا، ومبىدا، سەمەيدە ءاليحان بوكەيحانوۆتىڭ اتى بەرىلگەن كوشە جوق. ول ءبىلىم العان عيماراتتارعا بىردە- ءبىر ەستەلىك تاقتايشا قويىلماعان. ويتكەنى، بۇل عيماراتتار تاريحي قۇندىلىققا يە»، - دەدى عالىم.
بۇدان باسقا، قازاقستاننىڭ تاريحى مەن مادەنيەتى تۋرالى بلوگتىڭ نەگىزىن قالاۋشى جۋرناليست ايجان حاميت قارقارالىدا ءاليحان بوكەيحانوۆ وقىعان ۋچيليشە عيماراتىنىڭ جالعا بەرىلگەندىگىنە وكىنىش ءبىلدىردى.
«تاريحي تۇلعالارعا قاتىستى تاريحي عيماراتتاردى ساقتاي ءبىلۋىمىز كەرەك. ءاليحان بوكەيحان قازاق حالقىنىڭ ارداقتى ۇلدارىنىڭ ءبىرى. ول كوزى تىرىسىندە جەتكىلىكتى باعالانعان جوق»، - دەدى ول.
اۆتور: ايبوتا جاپپاربەرگەن