الماتى وبلىسىندا الامان بايگە وتەدى

تالدىقورعان. قازاقپارات - 29- شىلدەدە ساعات 14:00 دە رايىمبەك اۋدانىنداعى قارقارا اۋىلىنىڭ مىڭجىلقى جايلاۋىنداعى اتشاباردا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «تاريحقا تاعزىم» اتتى شارالار اياسىندا ۇلتتىق ات سپورتى تۇرلەرىنەن جانە قازاق كۇرەسىنەن اشىق وبلىستىق جارىستار وتكىزىلەدى.

 

وبلىس اكىمىنىڭ باسپا ءسوز قىزمەتىنىڭ حابارلاۋىنشا، جارىس باعدارلاماسىندا: 11 شاقىرىمعا قۇنان بايگە، 16 شاقىرىمعا توپ بايگە، 9 شاقىرىمعا جورعا اتتار جارىسى، 25 شاقىرىمعا الامان بايگە ۇيىمداستىرىلادى. بايگەنىڭ باس جۇلدەسىنە جەڭىل اۆتوكولىكتەر مەن اقشالاي سىيلىقتار تىگىلەدى.

سونىمەن قاتار كوكپار، تەڭگە ءىلۋ، قىز قۋۋ جانە اۋدارىسپاق ۇلتتىق سپورت تۇرلەرىنەن كورسەتىلىمدەر ۇسىنىلادى.