ءوز بەتىنشە قوسىمشا تولەم ەنگىزگەن بانكتەر زاڭ الدىندا جاۋاپ بەرەدى

الماتى. قازاقپارات - ۇلتتىق بانك قاراستىرعان كوميسسيالاردان بولەك، ءوز بەتىنشە قوسىمشا تولەم ەنگىزگەن بانكتەر زاڭ الدىندا جاۋاپ بەرەدى.

بۇل تۋرالى الماتىدا وتكەن باسپا ءسوز ءماسليحاتىندا ۇلتتىق بانكتىڭ قارجى ونىمدەرىن باقىلاۋ ءبولىمىنىڭ باسشىسى ايگۇل زاكاريانوۆا ايتتى. بۇلاي دەپ Tengrinews.kz جازدى.

ۇلتتىق بانك باسقارماسى 2016 -جىلعى 30 -مامىرداعى № 134 -قاۋلىسىمەن جەكە تۇلعاعا بەرىلگەن بانكتىك قارىز جانە ميكروكرەديت بەرۋگە جانە ولارعا قىزمەت كورسەتۋگە بايلانىستى كوميسسيالار مەن وزگە دە تولەمدەردىڭ تىزبەسىن بەكىتتى. جەكە تۇلعالاردىڭ قارىزدارى مەن ميكروكرەديتتەرى بويىنشا بەكىتىلگەن كوميسسيالار مەن وزگە تولەمدەر تىزبەسى جان- جاقتى قامتىلعان تىزبە بولىپ تابىلادى.

«جىل باسىندا ۇلتتىق بانك بەكىتكەن كوميسسيالار تىزىمىنەن بولەك، بانكتەردىڭ قالاۋىنشا قوسىمشا جارنا ەنگىزگەنى انىقتالسا، ۇلتتىق بانك زاڭ الدىندا ولاردى جاۋاپقا تارتا الادى»، - دەيدى ءبولىم باسشىسى. ونىڭ ىشىنە، ايىپپۇل دا كىرەدى. ءبولىم باسشىسىنىڭ ايتۋىنشا، بۇعان دەيىن بانكتەر كوميسسيانى ءوز بەتىنشە ەنگىزىپ كەلگەن.

ۆەدومستۆونىڭ حابارلاۋىنشا، الىناتىن كوميسسيا مەن باسقا تولەمدەر سانى ون بىردەن اسپايدى. ال بۇعان دەيىن بانكتەر 40 تان استام كوميسسيا مەن جەكە تولەمدەر ەنگىزىپ كەلگەن.

زاكاريانوۆا، ودان بولەك، بۇعان دەيىن «بانكتەر مەن بانك ءىسى» تۋرالى زاڭعا وزگەرىس ەنگىزىلىپ، وعان سايكەس قويۋعا بولاتىن كوميسسيا ءتىزىمىن ۇلتتىق بانك ەنگىزەدى دەپ بەكىتىلگەنىن ايتتى. ۇلتتىق بانكتىڭ ەنگىزگەن تالاپتارى قارىز الۋشىلاردىڭ قۇقىقتارىن قورعاۋعا، بارلىق بانكتىڭ قارىز بەرۋ كەزىندە الاتىن كوميسسيالار مەن تولەمدەر جايلى قارىز الۋشىنى حاباردار ەتۋدى مىندەتتەۋگە، كرەديتتەردىڭ قىمبات قۇنىن تومەندەتۋگە باعىتتالعان.