فرانسياداعى شىركەۋگە شابۋىل: ءدىن قىزمەتكەرى كوز جۇمدى

استانا. قازاقپارات - فرانسيانىڭ سولتۇستىگىندەگى سەنت-ەتەن-ديۋ-رۋۆرە شىركەۋىنىڭ عيماراتىن بەلگىسىز ەكى ادام باسىپ الدى، ناتيجەسىندە ءدىن قىزمەتكەرى قازا تاپتى، دەپ حابارلادى ر ي ا نوۆوستي.

شابۋىلشىلار عيماراتتىڭ ارتقى ەسىگىنەن كىرگەن.

سەنت- ەتەن- ديۋ- رۋۆرە - رۋان قالاسىنىڭ ماڭىندا ورنالاسقان، ەل پرەزيدەنتى فرانسۋا وللاندتىڭ تۋعان جەرى. وقيعا سەيسەنبى كۇنى تاڭعى 9:45 تە بولعان.

قاسكويلەر بەس ادامدى كەپىلگە العان: ءدىن قىزمەتكەرى، ەكى موناح ايەل جانە ءدىني قاۋىم مۇشەسى. يەلىكتەن قاشىپ شىققان موناح ايەل پوليتسياعا حابار بەرگەن.

شابۋىلشىلاردىڭ پىشاقپەن قارۋلانعانى بەلگىلى بولدى.

توتەنشە جاعداي ورنىنا پوليتسيا ارنايى كۇشتەرى كەلدى. ارنايى وپەراتسيا كەزىندە ەكى شابۋىلشى دا ءولتىرىلدى.

BFMTV تەلەارناسى قىلمىسكەرلەردىڭ شىركەۋ عيماراتىنان شىققان سوڭ ولتىرىلگەنىن حابارلاۋدا.

تۇتقىندار اراسىندا دا ءبىر ادام مەرت بولدى. 84 جاستاعى ءدىن قىزمەتكەرى جاك امەل العان جاراقاتتان كوز جۇمدى. تاعى ەكى ادام جارالانعان، ولاردىڭ ءبىرى ء«ومىر مەن ءولىم اراسىندا» جاتىر.

قىلمىسكەرلەر تۋرالى ازىرگە اقپارات جوق. جەرگىلىكتى ب ا ق ءبىر قىلمىسكەردىڭ ساقالى بولعانىن، باسىندا مۇسىلماندىق باسكيىم بولعانىن ايتۋدا.

ال BFMTV تەلەارناسى قىلمىسكەرلەردىڭ "اللاھ اكبار" دەپ ايقايلاعانىن راستادى.

شابۋىلدىڭ سەبەبى ءالى انىقتالعان جوق. iTele ارناسىنىڭ حابارلاۋىنشا، انتيتەرروريستىك پروكۋراتۋرا ءىستى تەرگەۋمەن اينالىسادى.

فرانسيا پرەزيدەنتى فرانسۋا وللاند شابۋىل جاساۋشىلاردىڭ «يسلام مەملەكەتى» ۇيىمىمەن قاتىسى بار ەكەنىن مالىمدەدى.

وتكەن جىلدىڭ قاراشا ايىنان بەرى فرانسيادا توتەنشە جاعداي رەجيمى جۇمىس ىستەۋدە. 14 -شىلدە كۇنى 84 ادام قازا تاپقان نيسساداعى تەراكتىدەن سوڭ، شەكتەۋ تاعى جارتى جىلعا سوزىلدى.