باس پروكۋراتۋرا «الداۋسىز ۇلەستىك باسپانا» جوباسىن ىسكە قوسادى

استانا. قازاقپارات - ءبىرىنشى جارتىجىلدىقتىڭ قورىتىندىلارىنا ارنالعان باس پروكۋراتۋرا القاسىنىڭ جينالىسىندا باس پروكۋرور جاقىپ اسانوۆ «الداۋسىز ۇلەستىك باسپانا» جوباسىن ىسكە قوسىلاتىنىن مالىمدەدى.

«كوپتەگەن ادامدار پاتەر تۋرالى ارمانداي وتىرىپ، بارلىق جيناعانىن جۇمسادى. ءبىراق ولاردى الدادى. سالۋشىمەن ۋاعدالاسقان كەزدە ولاردىڭ اراسىندا مەملەكەت بولعان جوق جانە بولماۋعا ءتيىس تە. بۇل جەردە ازاماتتىق قاتىناستار. بۇل «ساقالى بار» پروبلەما تۋرالى پرەزيدەنت تە كوپ رەت ايتقان بولاتىن.

ناتيجەسىندە ول باسپاناعا مۇقتاجدارعا كومەكتەسۋگە تىكەلەي تاپسىرما بەردى. اياقتالماعان وبەكتىلەر ۇلتتىق قور قاراجاتى ەسەبىنەن سالىنىپ ءبىتىپ جاتتى. 460 ميلليارد جۇمسالدى. سول كەزدە زاڭ قابىلداندى. قاتاڭ شارتتار جازىلدى. سوندا دا سالۋشىلار جولىن تاپتى. ينۆەستيتسيالىق شارتتار جاساسا باستادى. بۇل ىسكەرلىك سياقتى، ءبىراق تۇرعىن ءۇيدى سالىپ بىتەدى دەگەن ەشبىر كەپىلسىز.60 پروبلەمالى وبەكتى پايدا بولدى. ولاردى بارلىعى بىلەدى. «ازبۋكا جيليا»، «ال- باراكات»، «تامىز» جانە ت. ب. 9 مىڭ وتباسى باسپاناسىز. پروبلەمانىڭ ءوزىن شەشۋ بىزگە عانا بايلانىستى ەمەستىگى بەلگىلى. ينۆەستورلار قاجەت»، - دەيدى ج. اسانوۆ.

ول پروكۋرورلار ءوز تاراپىنان جەدەل تەرگەۋدى، كىنالىلەردى جازالاۋدى جانە زالالدى وتەۋدى قامتاماسى ەتۋگە ءتيىس ەكەنىن اتاپ ءوتتى.

«قازان ايىنان باستاپ جاڭا زاڭ جۇمىس ىستەيتىن بولادى. ەندى ازاماتتاردىڭ اقشاسىن تارتۋ ۇلەستىك قاتىسۋ تۋرالى شارت بويىنشا عانا مۇمكىن. ۋاقىت بولىپ تۇرعاندا حالىقتى دايىنداۋ كەرەك. بۇدان بىلاي ازاماتتار مەن سالۋشىلاردىڭ قاتىناستارىنا مەملەكەت ارالاسپايتىنىن ءتۇسىندىرۋ كەرەك. پاتەر ساتىپ العىسى كەلگەننىڭ ءارقايسىسى «ۇلەستىك قۇرىلىس شارتى» دەپ اتالاتىن شارت جاساسۋعا ءتيىس. ەگەر باسقاسى بولسا، وندا بارلىق قاۋىپتەر ءۇشىن ول ءوزى جاۋاپ بەرەدى. ەشكىم دە، ونىڭ ىشىندە مەملەكەت تە ونىڭ اقشاسىن قايتارمايدى. ول ۋاعدالاسقان ادامنان تالاپ ەتۋگە ءتيىس. بۇل ءۇشىن «الداۋسىز ۇلەستىك باسپانا» جوباسىن ىسكە قوسامىز»، - دەدى باس پروكۋرور.

بەك تولەۋوۆ

baq.kz