دەنساۋلىق: جاز ايلارىندا السىزدىكتەن قالاي قۇتىلۋعا بولادى؟

استانا. قازاقپارات - كۇن ىستىقتا جۇمىس ىستەۋ استە قيىن. السىزدىك پايدا بولادى ءارى مي جۇمىس ىستەۋ قابىلەتىن باسەڭدەتەدى.

وسى ۋاقىتتا ميدىڭ قىزمەتىن كەي ازىق- تۇلىك رەتتەي الادى. بۇل ازىقتاردى تەك جۇمىس كۇندەرى عانا ەمەس، دەمالىس كۇندەرى دە راتسيونعا قوسىپ تۇرۋ كەرەك، دەپ جازادى «ماسساگەت» پورتالىنىڭ دەنساۋلىق ايدارىندا.

ءىنجىر

بۇل جەمىس ءتاتتى عانا ەمەس، پايدالى. ونىڭ قۇرامىنداعى كالي گيپەرتونيا اۋرۋىنىڭ الدىن الادى. مي جاسۋشاسىنداعى جۇيكە سەرپىنىنىڭ تاسىمالىن جاقسارتادى. ءىنجىر قۇرامىنداعى ۆ6 دارۋمەنى مي قىزمەتى ءۇشىن ماڭىزدى. ادامنىڭ كوڭىل- كۇيىنە جاۋاپ بەرەتىن دوفامين جانە سەروتونين سەكىلدى گورمونداردىڭ بولىنۋىنە سەپتىگىن تيگىزەدى.

قارا جيدەك

قارا جيدەك كوزگە وتە پايدالى. وعان قوسا، جاز كەزىندە ميدىڭ جۇمىس جاساۋ قابىلەتىن ارتتىرادى. اسىرەسە، التسگەيمەر جانە پاركينسون اۋرۋلارىنىڭ الدىن الادى. ادامنىڭ جاسى كەلگەندە، زەيىنى تومەندەيتىنى بەلگىلى. قارا جيدەك وسى كەزدە مەيلىنشە سەپتىگىن تيگىزەدى. ونىڭ قۇرامىنداعى فلاۆونويدتار ەستە ساقتاۋ قابىلەتىن ارتتىرادى. ەگەر ءجيى جەپ تۇرساڭىز، لوگيكالىق، ماتەماتيكالىق ەسەپتەۋلەردى دە وڭاي شەشە الاسىز. تاڭعى اسقا جەلىنگەن ءبىر كەسە قارا جيدەك كۇنى بويى ميدىڭ جاقسى جۇمىس جاساۋىن قاداعالاپ وتىرادى.

شوكولاد

ول - ميعا قۋات بەرەتىن ماڭىزدى تاعام. اسىرەسە، كۇيزەلىس كەزىندە قارا شوكولاد جەسەڭىز، تىنىشتىق سىيلايدى. بۇل - ءبىر. ەكىنشىدەن، ءتاتتى. دەمەك، قۇرامىندا گليۋكوزا كوپ، گليۋكوزا ميدىڭ جاقسى جۇمىس جاساۋىنا سەپتىگىن تيگىزەدى. The Journal of Proteome Research جۋرنالىنىڭ جۇرگىزگەن ساراپتاماسىندا تاجىريبەگە قاتىسقان ادامدار ەكى اپتا ىشىندە، تاڭەرتەڭ جانە كەشكە 40 گ قارا شوكولادتان جەپ جۇرگەن. كەيىن ولاردىڭ اعزاسىنداعى كورتيزول - كۇيزەلىس گورمونىنىڭ تومەندەگەنىن بايقاعان. سونىمەن قاتار، شوكولاد ەندورفين، سەروتونين سەكىلدى پوزيتيۆتى كوڭىل- كۇي گارمونىنىڭ بولىنۋىنە سەبەپشى بولادى ەكەن.

گيپپوكرات «مي ساۋ جانە كۇيزەلىستەن الشاق بولعاندا عانا ادام دۇرىس ويلايدى» دەگەن. ميدىڭ دۇرىس جۇمىس جاساۋى - ءسىزدىڭ قولىڭىزدا.