تۇركيادا كۇرە جولدان شىعىپ كەتكەن كولىك جاعاجايدا دەمالىپ جاتقانداردى قاقتى
21:18, 22 - شىلدە 2016
استانا. قازاقپارات - تۇركيادا كۋشاداسى قالاسىندا كولىك كۇرە جولدان شىعىپ كەتىپ، جاعاجايدا دەمالىپ جاتقانداردى قاقتى.
سالدارىنان ءبىر ادام قازا تاپتى، تورتەۋى جاراقاتتاندى، دەپ حابارلادى ر ي ا نوۆوستي Hurriyet گازەتىنە سىلتەمە جاساپ.
84 جاستاعى جۇرگىزۋشى ماشينانى باسقارا الماي، جاعاجايداعى ادامداردى قاققان كۇيى تەڭىزگە بارىپ باتقانى اتالىپ ءوتىلدى. جاپا شەككەندەردىڭ اراسىندا ەكى جاسار بالا بار. دەمالىپ جاتقانداردىڭ ءبىرى جاراقاتتار سالدارىنان كوز جۇمدى.
زارداپ شەككەندەر اۋرۋحاناعا جەتكىزىلدى. قۇتقارۋ قىزمەتى اۆتوموبيلدى تەڭىزدەن الىپ شىقتى. پوليتسيا اپات ءىسى بويىنشا تەرگەي باستادى.