جوسپاردان تىس شارا: اكىمدىك قىزمەتكەرى جۋرناليستەرمەن بىرگە دۇكەن ارالادى
«استانا اكىمدىگى الەۋمەت ءۇشىن ەڭ قاجەتتى ازىق-تۇلىككە كۇن سايىن مونيتورينگ جۇرگىزىپ تۇرادى. مونيتورينگتىڭ ناتيجەسىنە قاراساق، 21 تاعامنىڭ باعاسى قىمباتتاعان»، - دەدى ا. لۋكين.
اكىم ورىنباسارىنىڭ ايتۋىنشا، ءوندىرۋشىنىڭ باعاسى ارتقان سوڭ، قانت باعاسى دا قىمباتتاعان. نەگىزگى قانت ءوندىرۋشى - «س ا س ك» ج ش س باعانىڭ ءوسۋىن قانت شيكىزاتىنىڭ ءبىر تونناسى 354 دوللار 477 دوللارعا جەتۋىمەن ءتۇسىندىرىپ وتىر ەكەن.
قانت باعاسىنا قاتىستى ماتەريال جاساۋ بارىسىندا 18 -شىلدە كۇنى قالاداعى ءىرى ساۋدا ورىندارىنىڭ ءبىرى - «Smoll» ساۋدا نۇكتەسىندە ورىن العان وقيعانى باياندادىق.
«بۇگىن تاڭەرتەڭ استانا قالاسىنىڭ اكىمى مەن ۇلتتىق ەكونوميكا ءمينيسترى استانا قالاسىنداعى ءتورت بازاردى ارالاپ كورىپ، جاعدايدى قاراستىرىپ، ءتيىستى تاپسىرما بەردى. قازىر مونوپولياعا قارسى كوميتەت بۇل جۇمىستى جۇرگىزەدى، ماتەريالدارىڭىزدى رۇقسات بولسا، بىزگە بەرسەڭىز»، - دەدى بريفينگ بارىسىندا اۋىل شارۋاشىلىعى باسقارماسىنىڭ باسشىسى ءا. قۇرمانعاليەۆ.
ونىڭ ايتۋىنشا، ءدال بۇگىن بازارداعى قانت باعاسى 300-320 تەڭگەنى قۇراپ وتىر ەكەن. دەگەنمەن، ءبىز قالا بويىنشا قانت باعاسى ءوسىپ قانا قويماي، ونى تابۋدىڭ ءوزى قيىنعا سوعىپ كەتكەنىن ايتىپ، بريفينگ اياقتالعان سوڭ، قانتتى ادەيى تىعۋ فاكتىسى تىركەلگەن ورىندارعا بىرگە بارۋدى ۇسىندىق. اكىمنىڭ ورىنباسارى ا. لۋكيننىڭ تاپسىرماسىمەن، بريفينگتەن كەيىن اسەت قۇرمانعاليەۆ جۋرناليستەرمەن بىرگە «Smoll» دۇكەنىنە اتتاندى.
دۇكەن سورەسىندە ءالى قانت جوق ەكەن. ونى اكىمدىكتىڭ وكىلى ءوز كوزىمەن كوردى. قانتتىڭ «قايدا كەتكەنىن» انىقتاۋ ءۇشىن دۇكەننىڭ قويماسىنا قاراي بەت الدىق.
ايتا كەتەرلىگى، بۇنىڭ الدىندا جۋرناليستەرگە دورەكى سويلەگەن دۇكەن قىزمەتكەرلەرى بۇگىن الدىمىزدان امانداسىپ شىقتى.
«قانت جوق. ءبىزدىڭ قويمادا قانت قورى جوق. كەيدە قانتتى شىعارىپ ۇلگەرمەي جاتامىز. ءبىز نەگىزىندە قانتتى ساتىپ الىپ جاتىرمىز...» ، - دەپ اڭگىمەسىن باستاعان ونى ءوزىن تانىستىرۋدان ءۇزىلدى-كەسىلدى باس تارتقان قىزمەتكەر جۋرناليستەردى ەرتىپ بارعان اكىمدىك قىزمەتكەرىمەن جەكە سويلەسەتىنىن ايتتى.
ءتىپتى، كابينەتتىڭ ەسىگىن يتەرىپ تۇرىپ، اكىمدىك پەن دۇكەن اراسىندا جۋرناليستەرگە «ەستىپ، كورۋگە، جازۋعا» بولمايتىن اڭگىمەنى جالعاستىردى. سىرتتا كۇتتىك. شىققان سوڭ اتى-ءجونىن ايتقىسى كەلمەگەن قىزمەتكەر، «قانتتى كوتەرمە باعامەن ساتىپ الاتىن ساۋداگەرلەر الادى دا ونى قايتا ساتادى، سوعان جول بەرمەۋ ءۇشىن قانت ساتىلماي جاتىر»، دەدى. ونىڭ ايتۋىنشا، قانت 252 تەڭگەدەن ساتىلعان. «وتكەن سەنبىدەن بەرى بىزدە قانت جوق» دەگەن وعان ءبىز دۇيسەنبى كۇنگى جۋرناليستەر دۇكەن قويماسىنان قانت «تاپقانىن» ايتىپ ەدىك، «مەن دۇيسەنبى كۇنى دەمالدىم» دەپ جاۋاپ بەردى...
بۇل اڭگىمەدەن كەيىن قالالىق اكىمدىكتىڭ اۋىل شارۋاشىلىعى باسقارماسىن باسقارىپ وتىرعان اسەت قۇرمانعاليەۆ «قازىر قازاقستان بويىنشا شيكىزات جوق بولىپ وتىر. وتكەن جىلى دا تەڭگە قۇنسىزدانعان كەزدە، قانت جوعالىپ كەتكەن ەدى. سودان كەيىن ءبىز زەرتتەۋ جۇرگىزىپ، ءتيىستى شارالاردى قولعا العان بولاتىنبىز. قازىر بۇل ماسەلەنى تاعى تەكسەرۋ كەرەك»، - دەدى.
ەندى مونوپولياعا قارسى كوميتەتتىڭ تەكسەرۋىن كۇتۋگە تۋرا كەلەدى.
اۆتور: كەنجەكەي توقتامۇرات قىزى