قاراعاندىدا جاستار اراسىنداعى ءدىني ەكسترەميزمنىڭ الدىن الۋ بويىنشا جۇمىستاردى كۇشەيتپەك

قاراعاندى. قازاقپارات - قاراعاندى وبلىسىندا جاستار اراسىنداعى ءدىني ەكسترەميزمنىڭ الدىن الۋ بويىنشا جۇمىستاردى كۇشەيتپەك.

بۇل تۋرالى جاستار ساياساتى بويىنشا وبلىستىق باسقارما باسشىسى ميراس قۇتتىباي مالىمدەدى.

«بۇگىن قاراعاندى وبلىسى ورتالىق مەشىتىنىڭ جاستار ءىسى بويىنشا بولىمىمەن ءوزارا ىنتىماقتاستىق تۋرالى مەموراندۋمعا قول قويامىز. قۇجات ماقساتى - جاستار اراسىندا ءداستۇرلى ءدىني سانانى قالىپتاستىرۋعا باعىتتالعان ءدىني ەكسترەميزمنىڭ الدىن الۋ بويىنشا كەشەندى شارالاردى جەتىلدىرۋ»، - دەدى م. قۇتتىباي كەلىسىم جاساۋ شاراسىندا.

ول راديكاليزم، ەكسترەميزم جانە تەرروريزمگە قارسى كۇرەس ەلباسىنىڭ «قازاقستان-2050 ستراتەگياسى»: قالىپتاسقان مەملەكەتتىڭ جاڭا ساياسي باعىتى» جولداۋىنداعى باسىم باعىتتاردىڭ ءبىرى ەكەنىن اتاپ ءوتتى.

ونىڭ سوزىنە قاراعاندا، مەملەكەتتىك ورگان مەن تەولوگتار، ءدىن سالاسىنداعى ساراپشىلار، ۇكىمەتتىك ەمەس ۇيىمدارمەن بايلانىس ورناتىلدى.

سونىمەن قاتار، ءدىن ىستەرى بويىنشا وبلىستىق باسقارما جانىنان وڭىرلىك كونفەسسياارالىق قاتىناستار ماسەلەلەرىن زەرتتەۋ جانە ساراپتاۋ ورتالىعى قۇرىلدى.

مەموراندۋمدى جۇزەگە اسىرۋ ءۇشىن قاتىسۋشىلار شارالاردىڭ ناقتى جوسپارىن جاسايدى.

ستاتيستيكا ورگاندارىنىڭ اقپاراتىنشا، 2016 -جىلدىڭ باسىندا قاراعاندى وبلىسىندا 14 پەن 29 جاس ارالىعىنداعى 315 مىڭ جاس تۇردى. بۇل ءوڭىر تۇرعىندارىنىڭ  23 پايىز قۇرايدى.