شاكەيەۆتى ىزدەۋ توبى ەكستراسەنستەردىڭ نۇسقاعان جەرلەرىن تەكسەرىپ شىقتى
الايدا سافار شاكەيەۆ ازىرگە تابىلعان جوق. بۇل تۋرالى شاكەيەۆتار وتباسىنىڭ دوسى ۆيكتوريا مومىنبايەۆا ءمالىم ەتتى.
«سافار شاكەيەۆ جوعالعالى بەرى التى تاۋلىك بويى پوليتسيانىڭ، دوستارىنىڭ جانە ەرىكتىلەردىڭ كۇشىمەن ىزدەستىرۋدىڭ بارلىق شارالارى اتقارىلدى: مىڭداعان ادامدار مەن كۋاگەرلەر سۇرالدى، بەينەباقىلاۋ كامەرالارى مەن دروندارمەن اۋەدەن تۇسىرگەن ۆيدەولار قارالدى، ىزدەستىرۋ حابارلامالارى قالانىڭ بارلىق اۋداندارىندا، ۆوكزالدار مەن قوعامدىق كولىكتەرگە جاپسىرىلدى، بارلىق تەلەفون قوڭىراۋلارى بويىنشا جۇمىستار اتقارىلدى. رەميزوۆكا اۋدانى جانە ونىڭ ماڭايىنا تولىق شولۋ جاسالدى، بارلىق بوس الاڭقايلار مەن قۇدىقتار، ءشوپ ءوسىپ كەتكەن جەرلەر مەن وزەندەر تەكسەرىلدى»، - دەپ اتاپ ءوتتى ەرىكتىلەردىڭ شتاب جەتەكشىلەرىنىڭ ءبىرى ۆ. مومىنوۆا.
«سونىمەن قاتار ءبىز ەكستراسەنس قابىلەتى بار ادامداردىڭ نۇسقاعان بارلىق جەرلەرىن ءجىتى قاراپ شىقتىق. بۇگىنگى كۇنگە بىزدە جاڭا نۇسقالار جوق، جانە ءبىز ءالى كۇنگە دەيىن بار بىلەتىنىمىز - سافاردى 16 -شىلدە كۇنى تاڭعى 07:30-دا ۆەسنوۆكا- ءال-فارابي قيىلىسىندا ءتۇسىپ قالعانى عانا» ، - دەپ قىنجىلادى ول.
سونىمەن بىرگە ول شتابتىڭ ورنى اۋىسقاندىعىن دا حابارلاي كەتتى.
«قۇرمەتتى ەرىكتىلەر! شتاب زەنكوۆ كوشەسى قيىلىسىنداعى گوگول، 39 كوشەسىنە، بيىك عيماراتتىڭ 4- قاباتىنا اۋىستى. كەزەكشى شتابتىڭ تاۋلىك بويى ىستەيتىن تەلەفوندارى: ۇيالى بايلانىس - 8707928649، قالالىق - 2590114»، - دەپ جازدى ۆ. مومىنبايەۆا.
«ىزدەۋگە شىن نيەتىمەن كومەكتەسىپ، بىزبەن بىرگە ىزدەستىرۋ جۇمىستارىنا بەلسەندى اتسالىسقان ادامدارعا العىسىمىزدى بىلدىرەمىز! گازەت، راديو مەن تەلەارنالار ارقىلى حالىققا حابارلاندىرۋدا قول ۇشىن بەرگەن باق وكىلدەرىنە ريزاشىلىعىمىز شەكسىز. «سافاردىڭ ۇيالى تەلەفونى تابىلىپتى» دەگەن اقپاراتتىڭ جالعان ەكەندىگىن دە حابارلاعىمىز كەلەدى. ەرىكتىلەرگە، ىزدەستىرۋگە قاتىسىپ جاتقان ازاماتتارعا سۋ، جاڭبىردان قورعايتىن كيىم مەن جارىق قۇرىلعىلارىن اكەلىپ بەرگەن ادامدارعا دا العىس ايتامىز»، - دەپ ءتۇيدى ءسوزىن ول.
اۆتور: جاسۇلان جولدىبايەۆ