قانات يسلام: وليمپيادادا ءبىر سپورتشىنىڭ ەمەس، بۇكىل قازاق ەلىنىڭ نامىسى سىنعا تۇسەدى - فوتو
«ەندى ساناۋلى كۇندە ريو وليمپياداسىنىڭ الاۋى تۇتانادى. ول جەردە ءبىر سپورتشىنىڭ ەمەس، بۇكىل قازاق ەلىنىڭ نامىسى سىنعا تۇسەدى. سوندىقتان، ريوعا باراتىن باۋىرلارىما كىشكەنە بولسا دا كومەگىم بولسىن دەپ سپاررينگ رەتىندە ا ق ش- تان بوكسشىلار شاقىرتتىم»، - دەپ باستادى اڭگىمەسىن قانات يسلام.
- بۇل بوكسشىلاردىڭ ەلگە كەلۋىنە ءسىز جەتەكشىلىك ەتتىڭىز بە؟ قانشا بوكسشى كەلدى؟
- مىنە، وزدەرىڭىز كورىپ تۇرعانداي، 7 بوكسشى كەلدى. بۇل جەكە مەنىڭ عانا ەڭبەگىم ەمەس. بوكس فەدەراتسياسىنىڭ باسىندا وتىرعان اعالاردىڭ ەڭبەگى. ول كىسىلەر ماعان «ا ق ش- تان ءوزىڭ جاتتىعىپ جۇرگەن جەردەن كاسىپقوي بوكسشىلار تابىلا ما؟ جول شىعىنىن ءبىز كوتەرەيىك، سەن ءبىزدىڭ بوكسشىلارعا سپاررينگ قارسىلاس بولاتىن بوكسشىلار بولسا قاراستىرىپ كورشى» دەپ سۇرادى. مەن كەلىسىپ، وسى بوكسشىلاردى تابۋعا جول جاسادىم.
- بۇل بوكسشىلاردىڭ ءبىزدىڭ سپورتشىلاردان قانداي ارتىقشىلقتارى بار؟
- ەشقانداي ارتىقشىلىعى جوق. بۇلار كاسىپقوي رينگتە جۇرگەن بوكسشىلار. ايىرماشىلىعى سول عانا. ءبىزدىڭ نەگىزگى ماقساتىمىز - وليمپيادا ويىندارى وڭتۇستىك امەريكادا وتكەلى وتىرعاندىقتان سول جاقتاعى بوكسشىلاردىڭ بوكستاسۋ ءستيلىن كورسەتۋ. ءار ءتۇرلى بوكسشىلارمەن جۇدىرىقتاستىرىپ، ءوز بوكسشىلارىمىزدىڭ شەبەرلىگىن شىڭداي ءتۇسۋ.
- بۇل بوكسشىلاردىڭ اراسىندا تيتۋلدىق بەلدىككە يە بوكسشىلار دا بار شىعار؟
- ارينە، بار. بارلىعى دا بوكس الەمىندە وزىندىك ورنى بار بوكسشىلار. قۇرلىقتىڭ ارعى بەتىنەن ارنايى شاقىرعان سوڭ ناشار بوكسشىلاردى الدىرمايتىنىمىز انىق.
- ءوزىڭىزدىڭ كەزەكتى جەكپە- جەگىڭىز تۋرالى ايتا كەتسەڭىز؟
- جوعارىدا ايتىپ وتكەنىمدەي، بارلىق جەكە شارۋالارىمدى ىسىرىپ تاستاپ، وسى ريودا ونەر كورسەتەتىن بوكسشى باۋىرلارىما كومەكتەسىپ جاتىرمىن. بۇل وليمپيادادا قازاق نامىسى سىنعا تۇسەدى. سوندىقتان، تامشىداي بولسا دا، ءوز كومەگىمدى جاساپ، تاجىريبەممەن ءبولىسىپ جاتىرمىن. ال، ءوز جەكپە-جەگىم تۋرالى جاقىندا بىلەتىن بولاسىزدار. قازىر كەلىسسوزدەر ءجۇرىپ جاتىر.
- ەندى اڭگىمەڭىزدىڭ سوڭىن بوكسشى باۋىرلارىڭىزعا دەگەن جاقسى ءبىر تىلەكپەن اياقتاساڭىز؟
- وسىندا ەل نامىسى ءۇشىن جاتتىعۋدان باس الماي، تەر توگىپ جاتقان بارلىق جىگىتتەرگە تەك ساتتىلىك جولداس بولىپ، وسى ماڭداي تەرلەرىنىڭ وتەۋىنە جەڭىس تۇعىرىنان قول بۇلعاپ قايتسىن دەگىم كەلەدى. جولدارى بولسىن. قازاق ەلىنىڭ تۋىن بيىكتەن جەلبىرەتسىن...
- اڭگىمەڭىزگە راحمەت!
اۆتور: كۇنسۇلتان وتارباي