ماماندار ادامداردىڭ جوعالۋىنىڭ باستى بىرنەشە سەبەبى بارىن ايتادى دەپ حابارلايدى «ازاتتىق».
الماتىدا كومپوزيتور ەركەش شاكەيەۆتىڭ ۇلىن - 25 جاستاعى سافار شاكەيەۆتى بىرنەشە كۇننەن بەرى ىزدەپ جاتىر. شىلدەنىڭ 16 سى كۇنى تاڭعى ساعات 7 دە قالاداعى بانكوماتتاردىڭ بىرىندە اقشا الىپ تۇرعان ءساتى ۆيدەوعا ءتۇسىپ قالعان جىگىتتەن ودان كەيىن حابار جوق. الماتى قالاسى ىشكى ىستەر دەپارتامەنتىنىڭ دەرەگىنشە، قازىر سافار شاكەيەۆتى 110 پوليتسەي مەن 60 ەرىكتى ىزدەپ ءجۇر.
بايقوڭىر قالاسىنىڭ تۇرعىنى جانىبەك بايلەپەسوۆ تە - تۋىسى جوعالعان ادامداردىڭ ءبىرى. ول جاسى 40 تان اسقان اعاسىن التى ايدان بەرى ىزدەپ ءجۇر.
«كوزىنە ەلەستەر كورىنىپ، تۇستەر كورىپ اۋىراتىنى بار ەدى. قاڭتاردا ۇيدەن شىعىپ، ورالمادى. ىزدەستىرىپ جاتىرمىز. حابار جوق»، - دەيدى ول.
قازاقستاندا جوعالعان ادامداردىڭ كوبى اقىل-ەسىندە اۋىتقۋشىلىعى بار جاندار مەن قارت كىسىلەر جانە بالالار ەكەنىن پوليتسيا وكىلى دارحان كوپجانوۆ تا ايتادى.
«كامەلەتكە تولماعان بالالاردىڭ كوبى اتا-اناسىمەن كەلىسپەي، ۇيدەن كەتىپ قالادى. جوعالاتىندار اراسىندا ماسكۇنەمدەر مەن ەسىرتكى شەگەتىندەر دە بار. كوپ جاعدايدا ىزدەۋدەگى ادامدار تابىلادى. وكىنىشتىسى - ءبىرازىنىڭ ءمايىتىن تابامىز. كەيدە جوعالعانداردىڭ سۇيەگى ءبىر-ەكى جىلدان كەيىن تابىلىپ جاتادى»، - دەيدى ول.
دارحان كوپجانوۆ ادام جوعالعانى تۋرالى كۇدىك پايدا بولسا، بىردەن پوليتسياعا حابارلاۋ كەرەك دەگەن كەڭەس بەرەدى.
«ىزدەستىرىلۋ جۇمىستارى ارىز تۇسكەننەن باستالادى. ودان كەيىن زاڭ بويىنشا ءىس قوزعالادى. وعان تەرگەۋ ءىسىن اشادى. تەرگەۋ ءىسى اشىلعاننان كەيىن ىزدەۋ باستالادى. ودان كەيىن ايعاقتار ارقىلى ءىس ودان ءارى جالعاسا بەرەدى»، - دەيدى ول.
قازاقستاندا جوعالعان ادامداردى نەگىزىنەن پوليتسيا مەن ەرىكتى توپتار ىزدەستىرەدى، كەيدە توتەنشە جاعداي قىزمەتى ماماندارى دا قوسىلادى. جوعالعان جانداردى ىزدەۋمەن اينالىساتىن سونداي ەرىكتىلەر توبىنىڭ ءبىرىنىڭ جەتەكشىسى ياشار باگيروۆ «ادام جوعالدى» دەگەن حاباردى ەستىگەن سوڭ بىردەن ونىڭ جاقىندارىنا حابارلاساتىندارىن ايتادى.
«تۋىسقاندارىنان جوعالعان ادامنىڭ تولىق اتى-ءجونى، ءتۇرلى سۋرەتتەرى، تۇرعىلىقتى مەكەن-جايى، نە نارسەگە قىزىققانى، نەمەن اينالىساتىنى تۋرالى تولىق اقپارات الامىز. الەۋمەتتىك جەلىدەگى جازبالارىن، حاتتارىن قاراپ شىعامىز. پوليتسياعا ىزدەۋ تۋرالى ارىز تۇسىرمەسە، كومەكتەسەمىز»، - دەيدى ول.
ياشار باگيروۆ جوعالعان ادامدى ىزدەستىرگەن كەزدە پوليتسيامەن بىرگە جۇمىس ىستەۋگە تىرىسادى.
«تاجىريبە كورسەتكەندەي، پوليتسيا ەرىكتىلەرگە قاراعاندا ءبىر قادام الدا جۇرەدى. سەبەبى ولاردىڭ ىزدەۋ تاسىلدەرى بار. ءبىراق ەرىكتىلەر پوليتسياعا قاراعاندا ەركىن جۇمىس ىستەيدى. ادامداردان اقپارات سۇراستىرعاندا دا ەركىن فورمادا سويلەسەمىز»، - دەيدى ول.
جوعالعان ادامداردى ىزدەستىرەتىن ەرىكتىلەر توبىنىڭ ەندى ءبىر مۇشەسى قاينار مۇراتوۆتىڭ سوزىنشە، ادامداردىڭ جوعالۋىنا قىلمىستىق وقيعالاردىڭ دا قاتىسى بولادى.
«ءبىر ادامدى ۇرلاپ كەتىپ، اقشا تالاپ ەتكەندەر دە بولدى. ءبىر ادامدى ءبىر ايدان كەيىن الماتى شەتىنەن ءولى كۇيىندە تاپتى. ونىڭ ءبىر بۇيرەگىن العان. بۇل قىلمىسقا الدىن-الا دايىندالعان سياقتى. ادامداردى قۇلدىققا سالۋ ءۇشىن نەمەسە جەزوكشەلىك جولمەن اقشا تاپتىرۋ ءۇشىن ۇرلاپ كەتەتىن دەرەكتەردى دە كەزدەستىردىك»، - دەيدى ول.
باس پروكۋراتۋراعا قاراستى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتتىڭ دەرەگىنشە، قازاقستاندا 2015-جىلى 3 مىڭ ادام ءىس-ءتۇسسىز جوعالعان، ال 2016-جىلدىڭ شىلدە ايىنداعى ستاتيستيكا بويىنشا 2 مىڭ 661 ادام (181 ءى - كامەلەتكە تولماعاندار) ىزدەۋدە ءجۇر. 2015-2016-جىلدارى جوعالدى دەلىنگەن ادامداردىڭ 1418 ءىنىڭ قايدا جۇرگەنى انىقتالعان، 157 ادامنىڭ سۇيەگى تابىلعان (ونىڭ 16 سىن قيناپ ولتىرگەنى انىقتالعان)، 10 جىلدان بەرى تابىلماعان 40 ادام ءولى دەپ تانىلعان.
باس پروكۋراتۋرا مالىمەتىنشە، جوعالعان ادامداردىڭ باسىم بولىگى - ەر ادامدار. رەسمي ورگان «اقىل-ەسىندە اۋىتقۋشىلىعى بار ادامدار مەن جاس بالالاردى كوزدەن تاسا ەتپەۋ كەرەك، جاسسپىرىمدەردىڭ قىلمىستىق جانە سۋبمادەني توپتارعا نە سەكتالارعا كىرىپ كەتپەۋىن باقىلاۋ قاجەت» دەگەن اقىل ايتادى.