ەلىمىزدەگى تۇڭعىش ايەل- گەنەرال اقمولا وبلىسىنىڭ قۇرمەتتى ازاماتى اتاندى
سەسسيادا ايماق باسشىسى سەرگەي كۋلاگين ەلەمىزدەگى ەڭ العاشقى ايەل-گەنەرال - ساۋلە ايتپايەۆاعا سالتاناتتى تۇردە «اقمولا وبلىسىنىڭ قۇرمەتتى ازاماتى» بەلگىسى مەن كۋالىگىن تاپسىردى، دەپ حابارلادى وبلىس اكىمىنىڭ باسپا ءسوز قىزمەتىنەن.
ءوڭىر باسشىسى قازاقستان رەسپۋبليكاسىنىڭ ەڭ العاشقى گەنەرال اتاعىن العان ايەلدىڭ ءبىزدىڭ وبلىسىمىزدان شىققاندىعىنا قۋاناتىندىعىن تاعى دا قايتالادى.
«اقمولا وبلىسىنان مىقتى ازاماتتاردىڭ شىعىپ جاتقانى قۋانىشتى. ولاردىڭ ىشىندە العاشقى ايەل- گەنەرالدىڭ ءبىزدىڭ وبلىستان شىعۋى ەرەكشە ماقتانىش سەزىمىن تۋدىرادى. جاقىندا عانا ءبىز جاقسى اۋدانىنان شىققان دارىندى سپورتشى دينا جولامانعا دا قۇرمەت كورسەتتىك. ەندى مىنە ساۋلە مۇحانبەديان قىزى وبلىستىڭ قۇرمەتتى ازاماتى اتانۋدا. ءبىز سىزدەرمەن ماقتانامىز. بۇگىن تۋعان ولكەڭىز ءسىزدى كەزەكتى قۋانىشىڭىزبەن قۇتتىقتايدى! جاڭا جەتىستىكتەرگە جەتە بەرىڭىز»، - دەدى اكىم.
ءوز كەزەگىندە ساۋلە ايتپايەۆا ءوڭىر باسشىسىنا العىسىن ءبىلدىردى.
«اقمولا وبلىسى - مەنىڭ تۋعان ولكەم. مەن وسى جەردە دۇنيەگە كەلدىم، وسى جەردە بالالىق شاعىم ءوتتى. بۇل جەردە مەنىڭ اتا- انام ءومىر ءسۇردى. بۇگىنگى كۇنى مەنىڭ الدىمداعى ەڭ باستى ماقسات - شاما- شارقىم كەلگەنشە جەرىمە، حالقىما، جالپى ەلىمە ادال قىزمەت ەتۋ. مەن ءوزىمدى وسىنداي بيىككە كوتەرگەن جەرلەستەرىمە ريزامىن، سىي- قۇرمەتتەرىڭىزگە راحمەت! سىزدەردىڭ دوستىق نيەتتەرىڭىز مەن ءۇشىن ەڭ قىمبات دارەجە» - دەدى ساۋلە مۇحانبەديان قىزى.
ەسكە سالا كەتەيىك، ساۋلە ايتپايەۆا اقمولا وبلىسىنىڭ جاقسى اۋدانىندا دۇنيەگە كەلگەن. ءوزىنىڭ ەڭبەك جولىن جاقسى اۋداندىق پروكۋراتۋراسىنىڭ كەڭسە مەڭگەرۋشىسى بولۋدان باستاعان. جوعارى ءبىلىم العاننان كەيىن اۋداندىق پروكۋراتۋرانىڭ تاعىلىمداماشىسى بولۋدان باستاپ رەسپۋبليكالىق ۆەدومستۆولاردىڭ باسشىسى دەيىنگى لاۋازىمدىق ساتىدان وتكەن. 2012 -جىلدىڭ ءساۋىر ايىنان باستاپ ق ر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپ كوميتەتىن باسقارادى.
ەرەن ەرلىگى ءۇشىن «قازاقستان رەسپۋبليكاسى پروكۋراتۋرا سالاسىنىڭ ۇزدىك قىزمەتشىسى» اتانعان، «داڭق» وردەنىنىڭ جانە وزگە دە مەملەكەتتىك بيىك ماراپاتتاردىڭ يەسى.
اۆتور: اسلان وسپانوۆ