قاراعاندىدا قانت تاپشى
«تۇراقتى قوردان نارىققا 150 توننا قانت شىعارىلدى. ءبىر كەلىسى 244 تەڭگەدەن ساتىلۋى ءتيىس بولعان. ءبىرىنشى كەزەكتە، الەۋمەتتىك پاۆيلوندارعا، ودان كەيىن ايماقتارداعى كوممۋنالدىق بازارلارعا جونەلتىلدى. ءۇشىنشى كەزەكتە - تۇراقتى قوردىڭ شارتىمەن كەلىسكەن سۋپەرماركەتتەرگە بەرىلدى. تۇپتەپ كەلگەندە، وسى كولەم قاجەتتىلىكتى وتەيتىن. ءبىراق، قازىر حالىق قانتتى بۇرىنعىدان دا كوپ الاتىن بولدى»، - دەدى وبلىستىق كاسىپكەرلىك باسقارماسىنىڭ جەتەكشىسى تاتيانا ابلايەۆا.
الەۋمەتتىك پاۆيلوندار مەن سۋپەرماركەتتەردە قانت ساتىلىمى ءبىر ادامعا 2 كەلىمەن شەكتەلىپ وتىر. ونىڭ ۇستىنە، ينتەرۆەنتسيالىق ءونىم از ۋاقىتتا ساتىلىپ بىتكەن. قۇمشەكەر تۇراتىن سورەلەر بوس قالىپ، رافينادتار عانا قالدى.
قاراعاندىداعى قانت باعاسى از ۋاقىتتىڭ ىشىندە ءبىر كەلىسى 260-270 تەڭگەدەن 300-350 تەڭگەگە دەيىن كوتەرىلگەن.
ت. ابلايەۆانىڭ حابارلاۋىنشا، بيلىك مونوپولياعا قارسى ورگانعا قانت باعاسىن 300 تەڭگەدەن اسىرعان كاسىپكەرلەرگە بايلانىستى تەرگەۋ جۇرگىزۋ تۋرالى ءوتىنىش جاسادى. جاقىن كۇندەرى قاراعاندى وڭىرىنە ءوندىرۋشى زاۋىتتان قوممەرتسيالىق قانت ءتۇسىمى بولادى دەپ كۇتىلۋدە. «ۆاگوندار جولدا كەلە جاتىر»، - دەدى باسقارما جەتەكشىسى.
وبلىستىق اكىمدىكتىڭ مالىمەتىنە سۇيەنسەك، وبلىس قالالارى مەن اۋداندارىندا 33 الەۋمەتتىك پاۆيلون، 4 كوممۋنالدى بازار جانە الەۋمەتتىك بۇرىش پەن الەۋمەتتىك قاتارى بار 285 ساۋدا نىسانى جۇمىس ىستەيدى.