نيسساداعى قاندى وقيعا: قازاقستاندىق ازامات قالاي اجالدان امان قالدى؟

استانا. قازاقپارات - قازاقستاندىق مەيرام قازيەۆ نيسساداعى قاندى وقيعاعا تاپ بولا جازداعان.

«تاعدىر. شىلدە ايىنىڭ باسىندا وتباسىمىزبەن نيسساعا جانە پاريجگە بارىپ قايتامىز دەپ شەشتىك. استانا - پاريج - استانا رەيسىنە بيلەتكە تاپسىرىس بەرىپ قويدىق، ەندى پاريج- نيسسا باعىتىنا بيلەت ىزدەي باستادىق. الايدا ءبىزدىڭ استانامىزدان پاريجگە ۇشاق جەرگىلىكتى ۋاقىتپەن 18:00 دە كەلىپ قونادى، ال نيسساعا سوڭعى رەيس 19:00 دە ەكەن. قالايدا ۇلگەرمەيتىن بولدىق. ۋاقىت جوعالتپاس ءۇشىن پاريجدە بىرنەشە كۇن بولىپ، ودان كەيىن نيسساعا ۇشامىز دەپ شەشتىك.

سونىمەن، 13 -شىلدە، سارسەنبى كۇنى شارل دە گول اۋەجايىنا كەلىپ قوندىق. قوناق ۇيگە ورنالاستىق، كوشەلەر مەن مۋزەيلەردى ارالادىق، ءبارى تاماشا ءوتىپ جاتتى. 15 -شىلدە، جۇما كۇنى تاڭ سارىدە (ۋاقىت ايىرماشىلىعى 4 ساعات) پاۆلودارلىق تانىس جولداسىمنىڭ قوڭىراۋى شىرت ۇيقىدان وياتتى: «امانسىڭدار ما؟ قايداسىڭدار؟». اۋەلدە تۇسىنبەي قالدىم. ال، ول بولسا: «تەلەديداردى قوس»، - دەيدى. بۇل كەزدە كوگىلدىر ەكراننان بارلىق ارنالار نيسساداعى تەراكت تۋرالى حابار تاراتىپ جاتقان بولاتىن.

ءدال وسى ۋاقىتتا ءبىز سول جەردە بولۋىمىز كەرەك ەدى. ءتىپتى، اعىلشىن جاعالاۋىنداعى قوناق ۇيدەن بولمە دە الىپ قويعانبىز. تەك كەيىن كەشكى رەيستىڭ بولماۋىنان بۇل ساپاردى ەكى- ءۇش كۇنگە كەرى شەگەرگەن ەدىك. شىنىندا، ءبىز دە وسى وتشاشۋعا بارار ەدىك قوي. وسىدان سوڭ قالاي تاعدىرعا سەنبەيسىڭ؟ الداعى كۇندەرى ءبارىبىر نيسساعا ۇشقالى وتىرمىن. قايعىلى وقيعا ورنىنا بارامىن، جازىقسىز قازا تاپقانداردىڭ قۇرمەتىنە گۇل شوقتارىن قويامىن. سەبەبى، ول جەردە مەن جانە مەنىڭ وتباسىم دا بولۋى مۇمكىن ەدى. ءبىر ءتۇرلى مۇڭ باسادى ەڭسەڭدى...» ، دەپ جازدى م. قازيەۆ ءوزىنىڭ فەيسبۋكتەگى پاراقشاسىندا.

ەستەرىڭىزگە سالا كەتەيىك، 14 -شىلدە كۇنى تۇندە باستيليا قامالىنىڭ الىنۋى مەرەكەسىنە وراي ۇيىمداستىرىلعان وتشاشۋدان سوڭ نيسسا قالاسىنىڭ اعىلشىن جاعالاۋىندا جينالعان جۇرتتى جۇك كولىگىن مىنگەن لاڭكەس تاپتاپ وتكەن ەدى، وقيعا سالدارىنان 84 ادام قازا تاۋىپ، 100 دەن استامى جارالانعان بولاتىن.