انتاليادا قازىر تىنىش، الايدا، كوشەلەردە قاۋىپسىزدىكتى كۇشەيتىپ جاتىر - تۇركياداعى قازاقستاندىق تۋريست

استانا. قازاقپارات - تۇركياعا ساياحاتتاپ كەتكەن قازاقستاندىق ازامات، «تامەرلان» تۋريستىك كومپانياسىنىڭ ديرەكتورى تالعات ءلاززات ۇلى قازاقپارات تىلشىسىنە سۇحبات بەرىپ، بولعان وقيعا جايىندا جانە وزدەرىمەن بىرگە جۇرگەن قازاقستاندىقتار تۋرالى ايتىپ بەردى.

- سىزدەر تۇركيانىڭ قاي قالاسىندا جۇرسىزدەر؟

- ءبىز انتاليا قالاسىندامىز.

- كەشەگى بولعان وقيعا جايىندا نە ايتا الاسىز، امانسىزدار ما؟

- ءيا، بىزدە ءبارى جاقسى. بولىپ جاتقان وقيعانىڭ بارلىعى ىستامبۇل مەن ەل استاناسى انكارادا بولىپ جاتىر. ال انتاليادا قازىر تىنىشتىق. الايدا، كوشەلەردە قاۋىپسىزدىكتى بارىنشا كۇشەيتىپ جاتىر. كوشەلەردە اسكەري ساربازدار تولىپ ءجۇر.

- تۇركياعا قاشان بارىپ ەدىڭىزدەر، قانشا ادامسىزدار؟

- تۇركياعا كەلگەلى بۇگىن سەگىزىنشى كۇن. ءبىر اپتاعا دەمالىپ قايتۋعا 8 ادام كەلگەن بولاتىنبىز. نەگىزى بۇگىن ەلگە ورالاتىن كۇنىمىز بولاتىن. رەيس كۇتىپ جاتىرمىز. قازاقستانعا ۇشاتىن ۇشاق ءدال قازىر جوق ەكەن. وسىدان بىرەر ساعات بۇرىن اۋەجايعا بارماقشى بولىپ جينالىپ شىققان ەدىك. وكىنىشكە قاراي، جولدان قايتادان قوناق ۇيگە كەرى قايتاردى.

- تۇركياداعى قازاقستان ەلشىلىگى تاراپىنان ءبىر نۇسقاۋلار بولدى ما؟

- ءوزىمىز ەلشىلىككە حابارلاسپادىق. كۇتىپ الۋشى تۋريستىك كومپانيالار بارىن سالىپ كومەكتەسىپ جاتىر. جاعدايىمىز جاقسى. قازاقستاننان ۇشاقتىڭ كەلۋ-كەلمەۋى كەشكى ساعات 7 گە دەيىن بەلگىلى بولاتىن بولدى. ەگەر رەيس بولماسا، بىزگە جاۋاپتى كومپانيا ارى قاراي قوناق ۇيدە قالدىرامىز دەپ وتىر.

- سىزدەر جاتقان قوناقۇيدە باسقا قازاقستاندىقتار بار ما؟

- ءيا، وسىندا 30 دان استام قازاقستاندىق ازامات بار. ءبارىمىز «MARTI MYRA- KEMER» دەگەن قوناق ۇيدە بىرگە تۇرىپ جاتىرمىز. بۇيىرسا، ەلگە بىرگە قايتپاقپىز.

- سۇحباتىڭىزعا راحمەت! ەلگە امان-ساۋ جەتۋلەرىڭىزگە تىلەكتەسپىز.

اۆتور: كۇنسۇلتان وتارباي