ريو وليمپياداسىنىڭ ۇمىتتەرى: جۇلدىزدىڭ جۇلدىزى جاناتىن ءسات تۋدى

استانا. قازاقپارات - ريو وليمپياداسىنا ساناۋلى كۇندەر عانا قالدى.

ەندى 20 كۇننەن كەيىن بيىلعى جىلدىڭ باستى دوداسىنىڭ الاۋى تۇتانادى. ءبىز بۇگىن وسى سىندا ەل نامىسىن قورعايتىن بالۋان قىزدارىمىزدى تانىستىرماقپىز.

ريودا ايەلدەر كۇرەسىنەن ءتورت بالۋانىمىز - جۇلدىز ەشىموۆا (48 كەلى)، ەكاتەرينا لاريونوۆا (63 كەلى)، ەلميرا سىزدىقوۆا (69 كەلى)، گۇزەل مانيۋروۆا (75 كەلى) ەل نامىسىن قورعايتىن بولادى. اۋەلى وسى بالۋاندارىمىزدى تانىستىرماس بۇرىن ەلىمىزدەگى ايەلدەر كۇرەسىنىڭ وسىعان دەيىنگى جەتىستىگىنە قىسقاشا توقتالىپ وتسەك.

كۇرەس تۇرلەرىنىڭ ىشىنە كىرگەن ايەلدەر كۇرەسى - ەندى دامىپ كەلە جاتقان سپورت ءتۇرى. كەڭەس وداعى كەزىندە بۇل سپورت ءتۇرى ك س ر و ەڭبەك سىڭىرگەن جاتتىقتىرۋشىسى، سامبو سپورتشىلارىن دايىنداپ شىعارعان ل. ب. تۋريليننىڭ ارقاسىندا دامي باستادى. فيلا (بىرىككەن كۇرەس تۇرلەرىنىڭ حالىقارالىق فەدەراتسياسى) ايەلدەر كۇرەسىنەن الەم چەمپيوناتتارىن 1989 -جىلدان باستاپ وتكىزىپ كەلەدى. وليمپيادا ويىندارىنىڭ باعدارلاماسىنا العاش بولىپ 2004 -جىلى ەنگىزىلدى. ءسويتىپ، ايەلدەر كۇرەسى جىل سايىن دامي ءتۇستى، اسىرەسە 2004 -جىلى افينادا وتكەن وليمپيادادان كەيىن بۇكىل الەمگە تانىمال بولىپ، قىزدار اراسىندا بۇل سپورت تۇرىنە دەگەن قىزىعۋشىلىق ارتا باستادى. جارىس 7 سالماق دارەجەسىندە وتكىزىلەدى.

قازاقستانداعى ايەلدەر كۇرەسى تانىمال ءارى ءداستۇرلى سپورت تۇرىنە اينالىپ ۇلگەرمەي-اق، ءبىزدىڭ سپورتشىلار ءبىرقاتار جەتىستىكتەرگە جەتىپ ۇلگەردى. ەل قۇراماسى 2007 -جىلى باكۋدەگى الەم چەمپيوناتىندا تابىستى ونەر كورسەتتى. ول كەزدە ولگا سميرنوۆا «كۇمىس»، ال ەلەنا شالىگينا مەن ولگا جانيبەكوۆا قورجىنىن «قولامەن» تولىقتىردى.

اراعا جىل سالىپ وليمپيادا ويىندارىنداعى بالۋان قىزدارىمىزدىڭ كوپتەن كۇتكەن كۇرەسى ءوتتى. بەيجىڭ وليمپياداسىنان ەلەنا شالىگينا قولا مەدالمەن ورالدى. سول 2008 -جىلى توكيوداعى الەم چەمپيوناتىنان جۇلدىز ەشىموۆا - تۋرتبايەۆا «كۇمىس» ولجالاپ قايتتى. ال حەرنينگتە (دانيا) ايەلدەر اراسىنداعى كۇرەستەن بولعان الەم چەمپيوناتىندا ەلەنا شالىگينا ءۇشىنشى ورىنعا تابان تىرەدى. 2012 -جىلى لوندون وليمپياداسىندا گۇزەل مانيۋروۆا «قولادان» القا تاعىندى.

ەندى ريودا كىمنىڭ باعى جانادى؟ ولاي بولسا بۇگىنگى تانىستىراتىن بالۋانىمىزعا كەزەك بەرەيىك.

ايەلدەر كۇرەسى

جۇلدىز ەشىموۆا:

تۋعان كۇنى:

1988-01-02

تۋعان جەرى:

قىرعىزستان

سالماق ساناتى:

48 كەلى

جاتتىقتىرۋشى:

جاقسىبەكوۆ س. ب.

جەتىستىكتەرى:

جاسوسپىرىمدەر اراسىنداعى ازيا چەمپيونى (2004)، ەرەسەكتەر اراسىنداعى ازيا چەمپيونى (2007)، جاستار اراسىنداعى الەم چەمپيوناتىنىڭ كۇمىس (2008) جانە قولا (2005, 2006) جۇلدەگەرى، ەرەسەكتەر اراسىنداعى الەم چەمپيوناتىنىڭ كۇمىس (2008) جانە قولا (2011) جۇلدەگەرى. گولدەن گران- پري سەرياسىنداعى حالىقارالىق تۋرنيرلەردىڭ جەڭىمپازى (2009, 2010)، كۇمىس (2011) جانە قولا (2010, 2011) جۇلدەگەرى. ق ر ەڭبەك سىڭىرگەن سپورت شەبەرى.

ەندى ريودا جۇلدىزدىڭ جۇلدىزى جاناتىن شاق. بالۋان قىزىمىزدان جۇلدە كۇتەمىز، ساتتىلىك جولداس بولسىن...

 

اۆتور: كۇنسۇلتان وتارباي