بالالار باسىلىمدارىنىڭ ساپاسىن كوتەرۋ ءبىز ءۇشىن كوكەيكەستى ماسەلە بولىپ وتىر - داۋرەن ابايەۆ
جيىنىمىزعا «قازاق ادەبيەتى»، «انا ءتىلى»، «ۇلان»، «ەكونوميكا»، «درۋجنىە رەبياتا»، «ۋيعۋر اۆازي» گازەتتەرى مەن «بالدىرعان»، «اق جەلكەن»، «ۇركەر»، «اقيقات»، «مىسل» جۋرنالدارىنىڭ باسشىلارى قاتىستى، دەپ جازدى ق ر اقپارات جانە كوممۋنيكاتسيالار ءمينيسترى داۋرەن ابايەۆ فەيسبۋكتەگى جەكە پاراقشاسىندا.
مينيستر وقىرمان سۇرانىسىن ارتتىرۋ ءۇشىن رەداكسيالىق ساياساتتى بۇگىنگى كۇنگە ساي جاڭعىرتۋ ماسەلەسى تالقىلانعانىن ايتتى.
«ارينە، قازىرگى قىم-قۋىت اقپاراتتار زامانىندا ءداستۇرلى مەديانىڭ توقتاۋسىز دامىعان ينتەرنەت-رەسۋرستارمەن باسەكەلەسە الاتىنى الدەقاشان دالەلدەنگەن. وعان مىسال جەتكىلىكتى. ءبىراق، ول ءۇشىن وقىرماننىڭ ۇدايى جاڭارىپ وتىراتىن قاجەتتىلىگىن ءدوپ باساتىن ساۋاتتى دا ۇتىمدى ستراتەگيا قاجەت.
كەزدەسۋدە بالالار مەن جاسوسپىرىمدەرگە ارنالعان جۋرنالداردىڭ بولاشاعى ماسەلەسىنە دە جەكەلەي توقتالدىق. وكىنىشكە قاراي، بۇگىنگى تاڭدا زاماناۋي دۇنيەلەرگە سۋساعان وسكەلەڭ ۇرپاقتىڭ شەتەلدىك مەديا-ونىمدەرگە قىزىعۋشىلىعى جوعارى ەكەنى جاسىرىن ەمەس.
سوندىقتان، وتاندىق بالالار باسىلىمدارىنىڭ، اعارتۋ باعدارلامالارىنىڭ ت. ب. ساپاسىن كوتەرۋ ءبىز ءۇشىن كوكەيكەستى ماسەلە بولىپ وتىر. وسىناۋ سان سالالى جۇمىستى سانداعان جىلدىق تاريحى، قالىپتاسقان ءداستۇرى بار «ۇلان»، «بالدىرعان»، «اق جەلكەن»، «درۋجنىە رەبياتا» باسىلىمدارىنان باستاۋعا ءتيىسپىز»، - دەدى داۋرەن ابايەۆ.
- پىكىر الماسۋدىڭ سوڭىندا باسىلىمدار ينتەرنەتتەگى جانە الەۋمەتتىك جەلىدەگى جۇمىستى كۇشەيتىپ، ينتەراكتيۆتىلىكتى ارتتىرۋى قاجەت دەگەن پىكىرگە توقتالدىق. سونىمەن قاتار، قوعامداعى كوكەيكەستى ماسەلەلەرگە باسا نازار اۋدارىپ، ءتول ونىمدەردىڭ بەت-بەينەسىن زامانعا ساي جاڭارتۋ جانە كادرلىق ساياساتى جاقسارتۋ قاجەت، - دەدى مينيستر ءسوزىن قورىتىندىلاي كەلە.
سونىمەن قاتار، داۋرەن ابايەۆ اقىن مۇحتار شاحانوۆپەن كەزدەسكەنىن ايتتى.
«بۇگىن ايتۋلى اقىن، قوعام قايراتكەرى جانە رەسپۋبليكالىق «جالىن» جۋرنالىنىڭ باس رەداكتورى مۇحتار شاحانوۆپەن جۇزدەستىم. مۇحتار اعامىزبەن اڭگىمە بارىسىندا وتاندىق جۋرناليستيكانىڭ بۇگىنگى اياق الىسىن، باسپا ءسوزدىڭ بولاشاعىن، سونىمەن قاتار، جاس قالامگەرلەرگە قولداۋ كورسەتۋ ماسەلەسىن تىلگە تيەك ەتتىك» - دەدى ق ر اقپارات جانە كوممۋنيكاتسيالار ءمينيسترى فەيسبۋكتەگى پاراقشاسىندا.