نيسسا قالاسىندا تۇرىپ جاتقان قازاقستاندىق سپورتشىلار ءدىن امان

استانا. قازاقپارات - فرانسيانىڭ نيسسا قالاسىنداعى شابۋىلدان قازاقستاندىق سپورتشىلار ەشقانداي زارداپ شەككەن جوق. ولار ءدىن امان.

بۇل تۋرالى تانىمال سپورت جۋرناليسى دينا تۇرار قىزى ءوزىنىڭ فەيسبۋكتەگى جەكە پاراقشاسىندا جازدى.

وندا: «تاڭ اتا الەۋمەتتىك جەلىدەن فرانسيانىڭ نيسسا قالاسىندا تەررورلىق اكت بولعانىن ەستىپ، وسى قالادا تۇراتىن دوسىم، استانا ۆەلوكومانداسىنىڭ بۇرىنعى شاباندوزى سەرگەي ياكوۆليەۆكە حابارلاستىم. قازاقستاندىق ۆەلوشاباندوزدار مەن كوماندانىڭ قازاقستاندىق قىزمەتكەرلەرىنىڭ باسىم بولىگى وسى قالادا وتباسىمەن بىرگە تۇرادى. سەرگەي جەرلەستەرىمىزدىڭ امان ەكەنىن ايتتى. مەرەكەلىك شارالاردى تاماشالاپ، وقيعا بولاردان ءسال بۇرىن ۇيلەرىنە قايتىپ كەتكەن»، دەپ جازىلعان جەكە پاراقشاسىندا.

ەستەرىڭىزگە سالا كەتەيىك، شىلدەنىڭ 14 ى كۇنى نيسسا جاعالاۋىندا باستيليا قامالىن الۋ كۇنىن تويلاۋ بارىسىندا جۇك كولىگى ادامداردى باسىپ-جانشىپ، كەيىن كولىكتەن جيىلعان جۇرتقا وق اتقان. شابۋىل سالدارىنان 84 ادام قازا تاپتى، ونىڭ ىشىندە بالالار بار، تاعى 18 ى اۋىر جاراقات الدى، 100 دەن استامى جاراقاتتاندى. فرانسيالىق ب ا ق جۇك كولىگىنەن 31 جاستاعى نيسسا تۇرعىنىنىڭ جەكە كۋالىگىن تاپقانىن، ونىڭ فرانسيامەن قاتار تۋنيس ازاماتى بولعانىن حابارلادى. پوليتسيا جۇك كولىگىنىڭ جۇرگىزۋشىسىن اتىپ تاستادى. كۇش قۇرىلىمدارى ونىڭ سىبايلاستارىنىڭ بولعانىن نە بولماعانىن انىقتاپ جاتىر.

اۆتور: كۇنسۇلتان وتارباي