سلاۆيان بازارى فەستيۆالىنىڭ مەرەكەلىك بايراعىن ديماش قۇدايبەرگەن كوتەردى

استانا. قازاقپارات - ءداستۇرلى تۇردە ءوتىپ كەلە جاتقانىنا 25 جىل تولعان «سلاۆيان بازارى» ونەر فەستيۆالىنىڭ مەرەيتويلىق تۋىن كوتەرۋ قازاقستاندىق تانىمال جاس ءانشى، اتالمىش سايىستىڭ 2015 -جىلعى گران- پري يەگەرى ديماش قۇدايبەرگەنگە بۇيىردى - دەپ حابارلايدى BAQ.kz ءتىلشىسى.

بۇل تۋرالى ديماشتىڭ اكەسى قانات ايتبايەۆ ءوزىنىڭ ينستاگرام پاراقشاسىندا جازدى. ءانشىنىڭ اكەسى ءوز سوزىندە بىلاي دەيدى: «بيىل «سلاۆيان بازارىنا» 25 جىل! وسى مەرەيتويلى سايىستىڭ تۋىن كوتەرۋ قۇرمەتى ءبىزدىڭ ديماشقا بۇيىرىپتى! سونىمەن قاتار سالتاناتتى كەشتە بارلىق قاتىسۋشىلار اتىنان بەلارۋس رەسپۋبليكاسىنىڭ پرەزيدەنتى الەكساندر لۋكاشەنكوعا ەستەلىك سىيلىق ۇسىنۋ دا ديماشقا تاپسىرىلىپتى. مۇنىڭ ءبارى ءبىزدىڭ ەلدىڭ مارتەبەسى! سىزدەردىڭ اق تىلەكتەرىڭىزدىڭ ناتيجەسى، اعايىن!!!» - دەپ جازادى.