استانا وپەرا تەاترىنىڭ سوليسى باقتيار ادامجان تۇركيادا باس جۇلدەنى جەڭىپ الدى
2016 -جىلدىڭ 8 -شىلدەسىندە سيۋرەي وپەرالىق تەاترىندا (قادىكەي اۋدانى، ىستانبۇل ق., تۇركيا) كونكۋرسقا قاتىسۋ ماقساتىندا قازاقستان، رەسەي، اۆستراليا، برازيليا، بولگاريا، جاپونيا، كانادا، وڭتۇستىك افريكا، وڭتۇستىك كورەيا جانە كوتپەگەن باسقا ەلدەردەن كەلگەن بالەت ارتىستەرى جينالدى. 3 كەزەڭ بويىنشا وتكەن كونكۋرس 13 -شىلدەگە دەيىن جالعاستى. قاتىسۋشىلار جاسى 15 پەن 26 ارالىعىندا شەكتەلدى. 13 -شىلدەدە سالتاناتتى گالا-كونسەرت ءوتىپ، باقتيار ادامجان مەن وزگە فينالعا شىققاندار كونكۋرس رەپەرتۋارىنان نومەرلەر ۇسىندى.
بەرليننىڭ مەملەكەتتىك بالەتىنىڭ كوركەمدىك جەتەكشىسى، «توكيو- بالەتتىڭ» شىعارماشىلىق جونىندەگى كەڭەسشىسى ۆلاديمير مالاحوۆ ءتوراعالىق ەتكەن بەدەلدى ءادىل قازىلار قۇرامىندا ەنگەندەر: ر. نۋرەيەۆ ات. بالەت ارتىستەرىنىڭ حالىقارالىق كونكۋرسىنىڭ ديرەكتورى ر. بوكور، سكوپە (ماكەدونيا) ءبي تەاترى جانە ءبي فەستيۆالىنىڭ ديرەكتورى ر. ريسيمكين، «Dance for You» جۋرنالىنىڭ رەداكتورى م. ۆيەرۋ، قازاقستاننىڭ حالىق ءارتىسى گ. تۇتقىبايەۆا، بوستون بالەتىنىڭ كوركەمدىك جەتەكشىسى م. نيسسينەن، گوللانديالىق ءبي فەستيۆالىنىڭ كوركەمدىك جەتەكشىسى، روتتەردامداعى ونەر ۋنيۆەرسيتەتىنىڭ «كودارتس» ءبي اكادەمياسىنىڭ اتقارۋ كەڭەسىنىڭ مۇشەسى س. ۆيۋرستەن جانە باسقالارى.
باقتيار ادامجاننىڭ بيلەگەنىن العاش كورگەن بەلگىلى بەيجىڭدىك حورەوگراف يسيان چجان ءارتىستىڭ بولاشاعى زور جانە فيزيكالىق كۇيى تاماشا ەكەنىن اتاپ ءوتتى.
- نومەردى قويماس بۇرىن، باقتياردىڭ ءستيلى مەن تەحنيكاسىن انىقتاۋ ءۇشىن، الدىمەن بيلەپ بەرۋىن ءوتىندىم. سوليست تاماشا فورمادا، ءبارىن جىلدام، لەزدە قاعىپ الادى، ءالى كوپ نارسەنى ۇيرەنۋى مۇمكىن. بىرىگىپ جۇمىس ىستەگەن ەكىنشى كۇننەن-اق وزگەرىستى بايقادىم - وسى قىسقا ۋاقىت ىشىندە ءارتىس ءوزى ءۇشىن جاڭا ءستيلدى مەڭگەرىپ، ايتارلىقتاي ءوستى. مەن ونىڭ شەبەرلىگى مەن العان ءبىلىمىن پاش ەتۋگە تىرىستىم، - دەيدى يسيان چجان.
ءوز كەزەگىندە باقتيار ادامجان دايىندىقتىڭ العاشقى ساتىنەن-اق جەڭىسكە قول جەتكىزۋگە بەل بۋعان ەدى.
- ىستانبۇلداعى كونكۋرسقا الەمنىڭ ءتۇرلى ەلدەرىنەن ۇزدىك بيشىلەر كەلدى، سول سەبەپتى مولىنان تاجىريبە الماستىق. تۇرىك كورەرمەنى مەنىڭ ونەرىمدى ىستىق ىقىلاسپەن قارسى الدى. زاماناۋي حورەوگرافيادان كەيىن كلاسسيكالىق بيگە «اۋىسۋ» وڭاي بولعان جوق. جاقىندا دۇنيەگە كەلگەن ۇلىمدى ويلاعانىم ءساتتى ونەر كورسەتۋىمە كومەگىن تيگىزدى. جەڭىس قاناتتاندىردى، ەندى مەنىڭ بۇرىنعىدان دا كوپ جۇمىس ىستەپ، ءوسىپ، الداعى ماقساتتارىما قول جەتكىزگىم كەلەدى، - دەدى ويىمەن بولىسكەن باقتيار ادامجان.