داللاستاعى قارالى راسىمدە ءبي بيلەگەن دجوردج بۋش سىنعا ۇشىرادى - كەسكىن
19:39, 13 - شىلدە 2016
استانا. قازاقپارات - ا ق ش بۇرىنعى پرەزيدەنتى كىشى دجوردج بۋشتىڭ داللاستاعى قازا تاپقان پوليتسەيلەردىڭ جانازاسىندا ءبي بيلەۋى الەۋمەتتىك جەلى قولدانۋشىلارىنىڭ نارازىلىعىن تۋدىردى.
ونىڭ ءبيى بەينەلەنگەن كادرلار عالامتوردا ەڭ كوپ تالقىلانعان تاقىرىپقا اينالدى.
تۇسىرىلىمدە بۋشتىڭ جان-جاعىنا ويناقى قوزعالعانى، قاسىنداعى حانىمداردىڭ قولىنان ۇستاپ روبوت ءبيىن بيلەگەنى كورىنىپ تۇر. حانىمداردىڭ اراسىندا امەريكانىڭ قازىرگى پرەزيدەنتىنىڭ ايەلى - ميشەل وباما دا بار.
ونىڭ ۇستىنە كىشى بۋش ازالى حورعا قوسىلىپ اندەتىپ، اراسىندا قالجىڭ ايتىپ، ولاردى كۇلدىرۋگە تىرىسقان.
الەۋمەتتىك جەلى قولدانۋشىلارى «ساياساتكەر ءىشىپ العان با؟»، «مۇنداي ادەپسىز جان قالايشا ەل باسقارىپ ءجۇر؟» دەگەن ءتارىزدى ءتۇرلى سۇراقتى جاۋدىردى. قارالى راسىمگە جينالعان حالىق داللاستاعى جاپپاي نارازىلىق پەن تارتىپسىزدىك كەزىندە اتىلعان پوليتسيا قىزمەتكەرلەرىنە ازا تۇتۋعا جينالعان بولاتىن، دەپ حابارلايدى tvzvezda.ru.