بەلگىسىز نىساندار نەگە كوپ؟
عالام دەمەكشى، اسپان الەمىنىڭ كەيدە ادام ساناسىنا كىرىپ بولمايتىن، ءتۇرلى قىزىقتارى كوڭىل اربايدى. ول الگى ءبىز كورىپ جۇرگەن فانتاستيكالىق فيلمدەرگە ۇقساپ كەتەدى. ال سول فيلمدەر شىن مانىسىندە، ومىردە بولاتىن قۇبىلىستاردان تۋىنداپ، تۇرلەنگەن دۇنيە ەمەس پە؟ ! سوندا عارىشتا بولىپ جاتقان تىلىسىم قايدان شىعىپ جاتىر؟ نەلىكتەن عارىش اپپاراتتارى كوك جۇزىندە بەلگىسىز جارىقتار مەن دىبىستارعا تاپ كەلىپ، جوعالىپ، جويىلىپ كەتەدى؟ نەلىكتەن ولار تابىلمايدى؟ تەحنيكالارىمىز زامان وتكەن سايىن بيىكتەپ بارادى دەگەنىمىزبەن، نەلىكتەن سول قۇبىلىستار الدىندا قاۋقارسىز؟ ءيا، بۇل تۇرعىدان كەلگەندە، ادامزات عارىش تۇرماق، ءوزى ءومىر ءسۇرىپ وتىرعان عالامشارىن دا تولىق اشا الماعىنىن ويلاپ، ول دەڭگەيگە جەتۋ ءالى دە الدا دەپ ءوزىمىزدى جۇباتىپ الامىز.
ءبىز اڭگىمەلەپ وتىرعان قۇبىلىستاردى قاراستىراتىن عىلىم دا پايدا بولعان. ءبىراق ولار ناقتى ءبىر عىلىمي جاڭالىق ەنگىزە الماعانىمەن، ايتار قورىتىندىلارى مەن دەرەكتەرى كوپ. ال دەرەكتەرى جىل وتكەن سايىن، تىم باسقا وقيعالارمەن تولىعىپ قالعان. سوندا «جاتجۇرتتىقتار»، «بەلگىسىز ۇشۋ نىساندارى» دەگەن اڭگىمە، شىن مانىسىندە بار، ءارى ولار ءتۇر- تۇرىمەن بولعانى ما؟ وسى تاقىرىپتا زەرتتەۋ جازعان بولاتبەك مۇحتاروۆ ۋفولوگياعا قاتىستى عىلىمي دەرەكتەردى ساباقتاي وتىرىپ: «بىرىنشىدەن ، اسپاننان اراگىدىك بايقالىپ قوياتىن، ۇشاتىن بەيمالىم نىسانداردىڭ بوگدە عالامشارلىق ومىرمەن قانداي دا ءبىر بايلانىسى بار ەكەنىنە عىلىم ءالى كۇنگە دەيىن ناقتى ايعاق تاپقان جوق. ەكىنشىدەن ، سىرى اشىلماعان، عىلىم تاني الماي وتىرعان ۇشاتىن بەيمالىم نىسانداردىڭ كوزگە كورىنگەنى، تىركەلگەنى فاكت رەتىندە عىلىمدا قالا بەرەدى. ۇشىنشىدەن، «ۇشاتىن تارەلكە» سياقتى جاريالى- استىرتىن بەيمالىم نىساندار ءوندىرىسى دە ءتۇرلى شاتاسۋلارعا ۇرىندىرىپ جۇرگەنى اقيقات. ماسەلەن، ا ق ش پەن گەرمانيا بۇگىندە شىعىر ءپىشىندى جانە باسقا دا ۇشۋ اپپاراتتارى ءوندىرىسى جونىنەن الەمدە كوش باستايدى. تورتىنشىدەن، قاراپايىم حالىقتىڭ استروفيزيكا، ۋفولوگيا جانە باسقا دا عىلىم سالالارى بويىنشا ءبىلىمى مەن قاجەتتى زەرتتەۋ جۇرگىزۋگە مۇمكىندىگىنىڭ بولماۋى دا قاۋەسەتتەردىڭ عاسىردان- عاسىرعا جالعاسۋىنا سەبەپ»، - دەپ تۇيىندەيدى.
وسى بەيمالىم ۇشاتىن نىساندار تۋرالى ۋيكيپەليا ەنتسيكلوپەدياسى: «بۇن- بەلگىلى نىسان نەمەسە قۇبىلىس رەتىندە انىقتالماعان، اسپاننىڭ كەز كەلگەن ايقىن انومالياسى بولىپ تابىلادى. ادەتتە، بۇن- عا بايلانىستى وزگە عالامشارلاردىڭ تۇرعىندارى نەمەسە وزگەعالامشارلىقتار دەگەن ۇعىم تۇسپالدانادى. ءبىراق كوبىنە دالەلدەمەلەرىنىڭ تومەن ساپاسىنا وراي (بەيرەسمي دالەلدەر جانە كۋاگەر سوزدەرى) بۇل پايىمداۋلار مۇمكىن ەمەس دەپ سانالادى. ال بەيمالىم ۇشاتىن نىساندارىن زەرتتەۋشى عىلىمدى ۋفوولوگيا، ياعني عالىمدارىن - ۋفولوگتار دەپ اتايدى»، - دەپ انىقتاما بەرەدى.
بەلگىسىز ۇشاتىن نىساندار تۋرالى العاشقى رەسمي دەرەكتەر III تۇتموس مىسىر فاراونىنىڭ (ب. ز. ب. 1486 - 1425 ج. ) تاريحي جىلنامالارىندا جازىلعان. قازىرگى زاماننىڭ قوعامىندا العاشقى رەت كەڭ تارالعانى - ا ق ش- تاعى نيۋ- مەكسيكو شتاتىنداعى روزۋەلل قالاسىنىڭ ماڭىندا 1947 -جىلدىڭ ماۋسىم ايىندا بولعان روزۋەللدەگى وقيعا تۋرالى مالىمەت.
ايتپاقشى، كۇنى كەشە عانا تىڭ ءبىر وقيعا ورىن الدى. وندا «ۆەستي. رۋ» سايتىنا سىلتەمە جاساپ حابارلاعان تەنگرينيۋس ءتىلشىسىنىڭ جەر شارىنىڭ اتموسفەراسىنا كىرىپ كەلە جاتقان بەلگىسىز نىساننىڭ ۆيدەوسى پايدا بولعانى تۋرالى اقپاراتى.
NASA جۇرگىزىپ وتىرعان ح ع س ترانسلياتسيا كەزىندە قايتا قاراۋ ارقىلى جارىق نىساندى كوردى. وسى ءۇزىندىنى ماماندار YouTube حوستينگىنە سالعان.
NASA ونلاين- ترانسلياتسيا كەزىندە كادردان بەلگىسىز نىساننىڭ پايدا بولۋىنا بايلانىستى ترانسلياتسيانى توقتاتتى. مۇنىڭ نە زات ەكەندىگىن ناقتى ايتۋ قيىن، الايدا ۋفولوگتاردىڭ ايتۋىنشا، بەيمالىم ۇشقىش نىسان (ن ل و) انىقتاماسى بويىنشا بارلىق بەلگىسىز نىسان قاراستىرىلا بەرەدى.
ءارتۇرلى نۇسقالار قاراستىرىلىپ جاتىر. ۋفولوگ سكوتت ۋورينگتىڭ ايتۋىنشا، بۇل نىسان مەتەوريت ەمەس. ءبىراق تا ماماننىڭ سوزىنە قاراعاندا، بۇل سپۋتنيك نە، مىسالى، قىتايلىق "تيانگۋن-1 عارىش ستانتسياسى بولۋى مۇمكىن.
بۇل عارىشتاعى قۇبىلىس دەلىك. ال ادامدار كورىپ جۇرگەن قۇبىلىستار شە؟ ! ولار اقيقاتىنا كەلگەندە، سىرى قانداي؟ ادامدارعا كىمدەر كەلىپ ءجۇر؟ جەردى جەردەگى ادامداردان بۇرىن، الىستاعى وزگە عالامشارلىقتار باسىپ الماق پا؟ شىنىنا كەلگەندە، وسى سۇراقتارعا جاۋاپ تولىق بەرىلگەن ەمەس. عارىش سالاسىنداعى الپاۋىت " NASA " اگەنتتىگى نەلىكتەن سونداي قۇبىلىستار بولعان جاعدايدا، بارلىعىن جاسىرىپ ۇستايدى. نەلىكتەن، عالىمدارى وتە قۇپيا جۇمىس ىستەيدى؟ سوندا الگى ءبىز ايتقان جاتجۇرتتىقتار بولعانى ما؟ بۇل تۋراسىندا الدا تاعى دا مىسالدار كەلتىرەمىز.
دايىنداعان: دوسجان بالابەك ۇلى