ءسىبىر جاراسى تاراعان قازاقستاننان رەسەي مەن قىتاي ەت ساتىپ العىسى كەلمەي قالدى
ماسەلەن، قازاقستان رەسەي فەدەراتسياسىنا 10 مىڭ توننا ەت ءونىمىن ەكسپورتتاعان. 50 مىڭ توننا ەت جەتكىزۋگە قىتايمەن ارادا كەلىسىمگە قول قويىلعان. الايدا ەلىمىزدە سوڭعى ۋاقىتتا مال اۋرۋىنىڭ تارالۋىنا بايلانىستى، ەكى تاراپ تا قازاقستاندىق سيىر ەتىن ساتىپ الۋدان باس تارتىپ وتىر، دەيدى «قازاقستاننىڭ ەت وداعى». وسىنىڭ سالدارىنان ولار سوڭعى بىرنەشە ايدا 3 ميلليارد تەڭگەدەي پايدادان قاعىلدى، دەپ ءمالىم ەتتى «استانا» تەلەارناسى.
«ەكسپورتتىڭ جاعدايى قازاقستانداعى ۆەتەرينارلىق ماسەلەلەرگە بايلانىستى بولىپ وتىر. ەگەر قانداي دا ءبىر اۋرۋ تارالاتىن بولسا، كەلىسىمشارتتار جابىلىپ، ءبىز شىعىنعا باتا باستايمىز. سونداي-اق ماسەلە ەگەر جەدەل تۇردە شەشىلمەيتىن بولسا، قۇيعان قىرۋار قاراجاتىمىزدان ايىرىلامىز»، - دەيدى «قازاقستاننىڭ ەت وداعى» ءتوراعاسى ماقسۇت باقتىبايەۆ.
ەلىمىزدە ەت ەكسپورتىمەن بىرنەشە ونداعان كاسىپورىن اينالىسادى. مۇنداي جاعدايلاردا ولار ءونىمدى ىشكى نارىققا باعىتتاۋىنا بولاتىن ەدى، الايدا بەلگىلى ءبىر كەدەرگىلەرگە بايلانىستى وعان مۇمكىندىك جوق. سوندىقتان وزگە ەلدەرمەن كەلىسسوزدەر جۇرگىزىپ جاتىر.
«باعاعا نەمەسە لوگيستيكالىق ماسەلەلەرگە بايلانىستى ىشكى نارىقتا جۇمىس ىستەي المايمىز. ءبىز ناقتى ەكسپورت ءۇشىن قۇرىلعانبىز. ال بۇگىندە ەكسپورتتاعى جۇمىسىمىز جۇرمەي جاتىر. قازىر ەتتى اراب امىرلىكتەرى جاعىنا قاراي جەتكىزۋ مۇمكىندىكتەرىن قاراستىرۋدامىز. ءبىراق ول ۋاقىت پەن ينۆەستيتسيانى قاجەت ەتەدى»، - دەيدى ەت ءوندىرۋشى راقىمجان ىسماعامبەتوۆ.
اۋىل شارۋاشىلىعى مينيسترلىگىندەگىلەر رەسەي جانە قىتاي تاراپىمەن كەلىسسوزدەر جۇرگىزىلىپ جاتقانىن، جاقىن ارادا ماسەلە شەشىلەتىنىن ايتادى. ەت وندىرۋشىلەر بولسا مال اۋرۋىنىڭ كەزەكتى رەت تارالۋىنان زارداپ شەكپەۋدىڭ جولدارىن ىزدەستىرۋدە. ولار شەنەۋنىكتەردەن جەكە ادامداردىڭ ءوز ۇيلەرىندە مال سويۋلارىنا تىيىم سالۋدى تالاپ ەتىپ وتىر.