بۇگىن الماتىعا باتىر كەلەدى

استانا. قازاقپارات - بۇگىن قازاقستاندىق جاس كاسىپقوي بوكسشى باتىر «777» جۇكەمبايەۆ (4-0, 4 ko) الماتىعا كەلەدى.

ول شىلدەنىڭ 7 ءى كۇنى (استانا ۋاقىتىمەن 8 شىلدەدە) كانادانىڭ كۆەبەك قالاسىندا ءوزىنىڭ كاسىبي رينگتەگى 4- جەكپە-جەگىن وتكىزىپ، ءتورتىنشى جەڭىسىنە قول جەتكىزگەن بولاتىن. جۇكەمبايەۆ كانادادا مەكسيكالىق بوكسشى رەندي لوزانوعا (10-10-2, 7 ko) قارسى وتكىزىپ، 3-راۋندتا تەحنيكالىق نوكاۋتپەن جەڭىسكە جەتتى. ول وسىعان دەيىن وتكىزگەن 3 جەكپە-جەگىندە دە قارسىلاستارىن مەرزىمىنەن بۇرىن نوكاۋتپەن ۇتقان بولاتىن. ازىرگە جەڭىلىستىڭ اشى ءدامىن تاتىپ كورمەگەن باتىردى جانكۇيەرلەرى بۇگىن تۇنگى ساعات 00:00-دە الماتى حالىقارالىق اۋەجايىندا كۇتىپ الادى دەپ جوسپارلانىپ وتىر. ول الماتىدا ءبىر ايعا جۋىق ۋاقىت تىنىعىپ الىپ، كەلەسى جەكپە-جەگىنە جاتتىعۋدى باستاماق.

اۆتور: كۇنسۇلتان وتارباي