پورتۋگاليا پرەزيدەنتى ۇلتتىق قۇراما فۋتبولشىلارىن وردەندەرمەن ماراپاتتاماق
13:54, 11 - شىلدە 2016
استانا. قازاقپارات - پورتۋگاليا پرەزيدەنتى مارسەلۋ رەبەلۋ دە سوۋزا ەۋرو-2016 چەمپيوندارى اتانعان فۋتبول بويىنشا ۇلتتىق قۇرامانىڭ ويىنشىلارىن ەڭبەگىنە قاراي وردەنمەن ماراپاتتاۋ شەشىمىن قابىلدادى.
مالىمدەمە پاريجدەگى شەشۋشى ويىننىڭ سوڭىندا جاسالدى، دەپ جازدى life.ru پورتۋگاليالىق Record گازەتىنە سىلتەمە جاساپ.
- ويىننىڭ قالاي اياقتالاتىنىنا قاراماستان ويىنشىلارعا وردەن بەرىلەتىنى تۋرالى شەشىم قابىلداندى، - دەدى پرەزيدەنت. - ونىڭ دارەجەسى عانا ناتيجەسىنە بايلانىستى بولۋى ءتيىس ەدى. بۇل ومىرىمىزدەگى ەرەكشە ءسات».
ەسكە سالا كەتەيىك، 10- شىلدەدە فۋتبولدان ەۋروپا چەمپيوناتى فرانسيا جانە پورتۋگاليا قۇرامالارىنىڭ ويىنىمەن اياقتالدى. تاريحتا العاش رەت پورتۋگاليالىق فۋتبولشىلار ەۋروپا چەمپيونى اتاندى. ويىننىڭ 110- مينۋتىندا ەدەر گول سوقتى.