اۋىل شارۋاشىلىعى مينيسترلىگى جالعا بەرىلەتىن جەرلەرگە مونيتورينگ ەنگىزۋدى ۇسىنادى
جەر رەفورماسى جونىندەگى رەسپۋبليكالىق كوميسسيانىڭ وتىرىسىندا اۋىل شارۋاشىلىعى ۆيتسە-ءمينيسترى ەرلان نىسانبايەۆ جەر زاڭناماسىن جەتىلدىرۋ تۋرالى بايانداماسىندا وسىلاي ءمالىم ەتتى.
مينيسترلىك وكىلىنىڭ ايتۋىنشا، قولدانىستاعى زاڭنامادا جالعا بەرىلۋى مۇمكىن جەرلەردىڭ شەكتى مولشەرى بەلگىلەنبەگەن. جەردى جالعا بەرۋ كونكۋرس ارقىلى، جالپى ەرەجەمەن جۇرگىزىلەدى. «ياعني، قولدانىستاعى زاڭنامادا جەردى جالعا بەرۋدىڭ اشىقتىعى قامتىلماعان. سوندىقتان دا، حالىقتىڭ جەر بولۋگە قاتىستى شارالارعا نارازىلىعى بار. وسىعان بايلانىستى اۋىل شارۋاشىلىعى جەرلەرىن 49 جىلعا جالعا بەرۋ شارتتارىن ساقتاي وتىرىپ، ونىڭ تيىمدىلىگىنە مونيتورينگ جۇرگىزۋدى ۇسىنامىز. بۇل رەتتە مونيتورينگ جەردى نىسانالى ماقساتىنا پايدالانۋىن قاراستىرادى، توپىراقتىڭ قۇنارلىلىعىن ساقتاۋ جانە لاستانۋىنا جول بەرمەۋدى تەكسەرەدى. سونىمەن قاتار، جەردى قورعاۋ جونىندەگى شارالار جۇرگىزىلىپ، جەردى ءتيىمدى پايدالانۋى باعالانادى»، دەدى ە. نىسانبايەۆ.
ونىڭ ايتۋىنشا، مونيتورينگتى باستاپقىدا ءاربىر بەس جىل سايىن وتكىزۋ ۇسىنىلادى. سوسىن ءاربىر جەتى جىلدا وتكىزىلەدى. بۇدان بولەك، جەر كودەكسىنە اۋىل شارۋاشىلىعى جەرلەرىن جالعا بەرۋ ءتارتىبىن رەتتەيتىن باپ ەنگىزۋدى ۇسىنامىز. وندا اۋىل شارۋاشىلىعى جەرلەرىن پايدالانۋعا بەرۋ ەرەكشەلىكتەرى بەلگىلەنەدى.
«ماسەلەن، اۋىل شارۋاشىلىعى جەرلەرىن تەك كونكۋرس ارقىلى جالعا بەرۋدى ۇسىنامىز. ونىڭ ەرەجەسىن ورتالىق مەملەكەتتىك ورگاندار بەكىتەدى. اشىقتىق پەن جاريالىلىقتى قامتاماسىز ەتۋ ءۇشىن جەر ءبولۋ جونىندەگى كونكۋرستىق كوميسسيانىڭ قۇرامىنا قوعامدىق بىرلەستىكتەردىڭ، ۇلتتىق كاسىپكەرلىك پالاتاسىنىڭ وكىلدەرى ەنگىزىلۋى كەرەك»، دەدى ۆيتسە-مينيستر.
بۇدان بولەك، مينيسترلىك اۋىل شارۋاشىلىعى جەرلەرىن جالعا بەرۋ بويىنشا كونكۋرس وتكىزۋدەگى اكىمدىكتەردىڭ ءىس-ارەكەتتەرى دە ناقتىلانباق. ايتالىق، اكىمدىكتەر كونكۋرسقا شىعارىلاتىن جەر ۋچاسكەلەرىنىڭ ءتىزىمىن انىقتاپ، جەردىڭ جالداۋ اقىسىنىڭ مولشەرىن ناقتىلايدى، كونكۋرس وتكىزۋدىڭ مەرزىمدەرىن بەلگىلەيدى.
ەسكە سالا كەتەيىك، جەر رەفورماسى جونىندەگى كوميسسيا وتىرىسىندا بۇگىن ءۇش ماسەلە قارالۋدا. ولار: جالعا بەرۋ ينستيتۋتىنىڭ قالپىنا كەلۋىنە بايلانىستى ماسەلەلەر؛ شەكارا ماڭىنداعى جەردى پايدالانۋ ماسەلەسى؛ جايىلىم ماسەلەسى.
اۆتور: قانات مامەتقازى ۇلى