ۇكىمەتكە تۇرعىن ءۇي قۇرىلىسىنىڭ جاڭا باعدارلاماسى ۇسىنىلادى

  استانا. قازاقپارات - ۇكىمەتكە تۇرعىن ءۇي قۇرىلىسىنىڭ جاڭا باعدارلاماسى ۇسىنىلادى. بۇل تۋرالى بۇگىن ۇكىمەت وتىرىسىندا ق ر ۇلتتىق ەكونوميكا ءمينيسترى قۋاندىق بيشىمبايەۆ ءمالىم ەتتى.

 ايتا كەتەرلىگى، ەلباسى تۇرعىن ءۇي ماسەلەسىن تۇبەگەيلى شەشۋ ماقساتىندا ساتىپ الۋ قۇقىعىنسىز جالعا بەرىلەتىن باسپانا بويىنشا الداعى 15  جىلدا 1,5 ميلليون پاتەر سالۋدى تاپسىرعان بولاتىن. بۇل رەتتە ساتىپ الۋ قۇقىعىنسىز جالدامالى باسپانا حالىقتىڭ الەۋمەتتىك- ءالسىز بولىگىنە، سونىمەن قوسا جۇمىس كۇشىنىڭ قوزعالىسىن جوعارىلاتۋ ءۇشىن ۇسىنىلاتىن بولادى.

 «ەلباسىنىڭ تاپسىرماسى شەڭبەرىندە «بايتەرەك» ا ق- مەن ساتىپ الۋ جولىمەن جالدامالى باسپانا قۇرىلىسى باستالدى جانە مۇنداي باسپانا قۇرىلىسىنا 20  جىل ىشىندە قايتارۋ نەگىزدە ۇلتتىق قوردان قاراجات بولىنگەن. وسىعان بايلانىستى، باستالعان قۇرىلىستىڭ نىسانالى باعىتىن ساتىپ الۋ قۇقىعىنسىز باسپانا قۇرىلىسىنا وزگەرتۋ جانە ونىڭ قايتارىمدىلىق مەرزىمىنىڭ ۇزاقتىعىن ەسكەرە وتىرىپ، بولىنگەن قاراجاتتىڭ قايتارىمدىلىق مەرزىمىن 60  جىلعا دەيىن بەلگىلەۋ ۇسىنىلادى. باعدارلاما ماقۇلدانعان جاعدايدا، مينيسترلىك ءتيىستى جۇمىستار اتقاراتىن بولادى. ءوز كەزەگىندە، كرەديتتىك باسپانا قۇرىلىسى باسپاناعا مۇقتاجداردى تۇرعىن ءۇي قۇرىلىسى جيناقتاۋ قۇرالدارىن قولدانۋعا ىنتالاندىراتىن بولادى. سونىمەن قوسا، ينجەنەرلىك- كوممۋنيكاتسيالىق ينفراقۇرىلىمدى جەتكىزۋ ارقىلى جەكە تۇرعىن ءۇي قۇرىلىسىن قولداۋ ودان ءارى جالعاساتىن بولادى. وسىعان وراي، تۇرعىن ءۇي قۇرىلىسىنىڭ جاڭا باعدارلاماسى ازىرلەنۋدە. ونى ۇكىمەتتىڭ قاراۋىنا 19 -شىلدەدە ۇسىنۋ جوسپارلانىپ وتىر» ، - دەدى مينيستر.

  

اۆتور: قانات مامەتقازى ۇلى